Rojda Aydin - Rabîa Onver 

 

AMED – Cinîyê ke bajaranê cîyayan ra bi wesîleya 4ê Nîsane verê xo dayî Amareye vengê şikitişê tecrîdî kerdî. Cinîyan ard ziwan ke 24 serrî yo tecrîdêk giran yeno rayraberdiş û vatî ke bi nê tecrîdî wazenê ke vengê Abdullah Ocalanî bibirnê, teda û zilm serê şarê kurdî de pê bîyarê. 

 

Rayberê PKKyî Abdullah Ocalan 24 serrî yo binê tecrîdek giran de yeno tepiştiş û di serrî yo ke tu hawayêkê ne avûkat û ne zî keyeyê ci nêeşkenê ci ra xeberêk bigêrê. Avûkat û keyeyê Abdullah Ocalanî seba pêvînayîşî her hewte muracatê Serdozgerîya Komare ya Bursaye kenê, la heme muracatê înan bê cewab manenê. Cinîyê ke bajaranê cîyayan ra bi wesîleya 4ê Nîsane verê xo dayî dewa Amare ya qezaya Xelfetî ya Riha vengê şikitişê tecrîdî kerdî. Cinîyan ardî ziwan ke seba tecrîdî bişikinê û Abdullah Ocalan bireso azadîya xo ya fîzîkî ameyî Amaraye.

‘Seba tecrîd bişikîyo ma ameyî Amara’ 

 

Mulkîye Demîre tecrîdo ke 24 serrî yo Girava Îmraliyî de yeno rayraberdiş şermizar kerd û vat ke no di serrî yo ke Abdullah Ocalanî ra xebere nîna girewtiş û vat: “Ma wazenê ke tecrîd bişikîyo û serek bireso azadîya xo. Seba ke tecrîd bêro şikitiş û azadîya fîzîkî pê bêro ma ameyî Amara. Ma seba Serek Amaraye de yê. Serek çinî bo ma zî çinî yê. Ma azadîya Birêz Ocalanî wazenê. Wa Serek zî bireso azadîya xo û ma ci zî mîyanê xo de wazenê. Hemverê nê tecrîdî de ganî şarê kurd werizo payan ser. Hemverê nê tecrîdî de wa heme bibî yew û dewaya heqanê xo bikerê. Ma wayîrê Serek û wayîrê welatê xo vejîyenê. Ma bajarê bîn ra ameyî Amara. Ma seba şikitişê tecrîdê Îmraliyî ameyî. Wa tecrîdê serê Serekî bişikîyo. Ma tîya ra heta Îmraliyî silaman şirawenê.”

 

‘Ma azadîya fîzîkî ya Serek Apoyî wazenê’

 

Taybet Kalkane zî tecrîdê serê Abdullah Ocalanî nalet kerd û wina vat: “Ma bi wesîleya Apo, bîyayîşê xo ra hayîdar ê. Ma cinîyî verê cû bindest bî. Her tim zilm û zordarî serê ma cinîyan de estbî. Dewleta Tirke cinîyan ra tersena. Seba ke tecrîdê serê Serekatî bêro şikitiş ma cinî Mêrsînî ra ameyî ver bi Amaraye. Ma cinîyî bi wesîleya Serek Apoyî weriştî payan ser û raştîya xo ra hayîdar bîyî. Ma waştişê azadîya fîzîkî ya Apoyî kenê. Heta ke Serek Apo azad nêbo şarê kurd, şarê Tirkîyaye zî azad nêbeno. Lazim o ke Apo bireso azadîya xo. Êdî bes o nê tecrîdî rê. Ma nê tecrîdî qebul nêkenê û ganî no tecrîd bişiko. Ma êdî zilm û zorî qebul nêkenê. Ma şer nêwazenê. Amacê dewleta tirke no yo ke zilm û zordarîya serê şarê kurdî rayra biba û çinî bikero. Bi girankerdişê nê tecrîdî nêwazenê vengê Serek bireso komelî. Bi girankerdişê tecrîdî şer zêde bî. No tecrîd taybetî serê cinîyan de tesîr viraşto. Ma sey cinîyî nê tecrîdî qebul nêkenê. Ma aştî, azadî û seyyewbînanî wazenê. Bijî Serek Apo.” 

 

‘Ma bi mîlyonan kurdî serê rêçe ci de yê’

 

Tenzîle Agataye zî da zanayîş ke Abdullah Ocalan 24 serrî yo zîndan de ganî yeno tepiştiş û no tecrîd her ke şino giran beno. Tenzîleye vat ke azadîya Abdullah Ocalanî wazenê û wina vat: “Ganî Şarê Kurd wirzo payan ser û nê tecrîdî bişikno. Ma wazenê ke berê zîndanan biabî û Serek Apo û heme tepişteyê binî serbest bêrî verdayîş. Waştişê ma seyyewbînanî û serkewtiş o. Ma hemverê tecrîdê serê Serekî de ameyî Amara. Dewleta tirke wazena şarê kurd çinî bibo. Kurd her tim û her game estê. Ma bi mîlyonan kurdî estê û serê şopê ci de yê. Ma wazenê ke no tecrîd bişikîyo. Ma nê zilmî qet qebul nêkenî û coka ra zî ma ameyî Amare. Ganî şarê kurd hemverê tecrîdî de bêveng nêmano û wirzo payan ser. Ma qet xîyanetê yewbînan qebul nêkenê.”