Melek Avci

 

ANQARA - Parlamentoya Ewropaye Qirkerdişê Halepçe sey ‘qirkerdiş’ nas kerd. Parlametnera Partîya Keske Berîvan Aslane dîyar kerd ke Tirkîya de rîbirîameyîşê bi qirkerdişanê sîyasîyan çinî ya û vat: “Welatê ke qirkerdişan nêşinasnî, fikirîyayîşê înan ke kişta aştî û asayîşî de bibî zî çinî yo.” 

 

Parlamentoya Eyaletê Vîyana ya Avusturyaye 23yê Adare de Qirkerdişê Halepçe ke serra 1988an de hetê Saddam Huseyînî ra bajarê Halepçe de hember Kurdan de pê ard, sey ‘qirkerdiş’ nas kerd. Parlamentera Kurde ya Partîya Keske Bêrîvan Aslane seba girewtişê qerarî serkêşîye kerd. Bi pêşnimuneyê hempar yê Kesk, Partîya Demokrat Sosyale ya Avusturyaye (SPO), Forumê Lîberal û Avusturye yê Nene (NEOS) parlamento de Qirkerdişê Halepçeyî bi yew raydayîşî ame qebulkerdiş. Bêrîvane derheqê qirkerdişê Êzidîyan yê Şingalî de zî serra 2017î de pênimune da û Parlamentoya Eyaletê Vîyanaye qebul kerd la waştişê Êzidîyan sey ‘qirkerdişê Kurd’ nê sey ‘Qirkerdişê Êzidîyan’ ameybî pêşkêşkerdiş.

 

Parlamenter Bêrîvan Aslane derheqê babete de JINNEWSî rê qisey kerd. 

 

Bêrîvane da zanayîş ke hemverê Kurdan de xeylê qirkerdişî pê ameyî û wina vat: “Ez kewta zehmetî ke kam cû ra dest pêbikera ke pêşkêşê parlementoye bikera. Rojbîyayîşê mi 16ê Adare ya. La her tim zerrîya mi şikiteya. Ez Kurd a û rojbîyayîşê mi zî roja qirkerdişî ya. Ez kewta mîyanê hewldayîşî ke no qetyîyam sey qirkerdişî bêro naskerdiş. Pêvînayîş wina asan nêbî. Welatê rojawanî hetê babeta qirkerdişan de xo tay dane kişte. Çimkî naskerdişê qirkerdişî eynî ewext de ameyêne manaya berpirsîyarîya sîyasî. Coka ra zî welatî zêde nêwazenê ke qirkerdişan nas bikerî. 

 

Tarîxê sîyasî yê Avusturyaye de yewine bî

 

Bêrîvane dîyar kerd ke muracato ke ameyo kerdiş bi yew raydayîşî ameyo qebulkerdiş û bin o hawa yewine reyo ke qirkerdişê Kurd Avusturya de yeno naskerdiş. Bêrîvane wina dewam kerd: “Mi prosesê muzakereyî de tena xebate rayra berd. Werikêna têgêrayîşê Kurd zî tewrê ci bibayêne la rojeva înan cîya û dekerde bî. Nêeşkayê ke tewrê ci bibî. Mi pêşnimune pêşkêş kerd. Hetê tarîxê sîyasî yê Avusturyaye de no yewine bî. Bi însîyatîfê mi Qirkerdişê Êzidîyan zî ame naskerdiş. Serra 2017î de mi pêşkêşê meclîsê Avusturyaye kerd. No zî bi yew raydayîşî ame qebulkerdiş.”

 

Pêwa 30 serrî derbaz bîyo çîyêk nêvuryayo’

 

Bêrîvane da zanayîş ke pêwa 30 serrî derbaz bîya çîyêk nêvuryayo û wina vat: “30 serrî verê sektorê çekan, sektorê şer, sektorêk ke ku cînayetan û qirkerdişan wey bîne. 30 serrî derbaz bî eynî çî dewam keno. Tu cîyayê çin o. Seba nê ganî ameyê rî yewbînan, pê bêro. Ganî ma berpirsyarî bigîrê serê xo û rexne bikerê. Welatî çekan roşenê qirkerdişan de rol kay kenê. Hewce nîyo ma şêrê 30 serrî verê.  Xeylêk qirkerdişî ameyî ciwîyayîş. Heta ke cezakerdişêk rast pê nêro do Tirkîya û welatê bînî her çî bikerê goreyê xo tê bigêrê. Ez OPCW û sazgehanê bînan ê mîyanneteweyî zî rexne kena. Sîstemê sîyasî de vengî û qelsîyêk esto.”

 

‘Tirkîya de tu wext demokrasî çinbî’

 

Bêrîvane bale ant serê weçînayîşê do 14ê Gulane de Tirkîya pêk ame û wina vat: “Wa kurdî nêrêhetîyê ‘Erdogan şi do kurdî azad bibê’. Rewşa kurdan vernîya AKPyî de zî baş nêbî. Çi heyf Tirkîya de tu wext demokrasî çinbî. Kurdî tu wext bi hawayêkê fermî do destûrê bingehîn de derbaz nêbî, nêameyî nasnayîş. Seba nê zî ganî kes nêkewo do atmosferê Erdogan şêro do her çî baş bibo. Belkî kurdî tay rehet bê la ganî zêde bi hêvî nêbê. Seba vurnayîşî sere de destûrê bingehîn bivuro. Ganî zîhnîyetê komelî bivuro. Ganî raşteyê sîyasî de weşbinî bibo. Ma weçînotoxê Tirkîya biewnê sera 75 nîjadperestê rastgir ê. Kesê ke vanê ‘ez kurd a’ vanê ‘Kurdperestî’. Komelêk ke kurdî rê tehemul nêkeno, esto. Prosesê bêro de ma do demokrasî û reformasyono ke senîn aver şêro bivînê.”