Zelal Tunç - Rahime Tekin

 

WAN - Cinîyê Wanî yê tewrê akerdişê buroyê Partîya Çep a Keske bî, dîyar kerd ke 14ê Gulane seba kurdan û cinîyê kurdî wayîrê tarîxîyêk o û vatî: "14ê Gulane ya ma ya, partîya alternatîf Partîya Çep a Keske ya."

 

Partîya Çep a Keske seba 14ê Gulane xebatê xo yê weçînayîşî dewam kena. Xeylêk kesî tewrê akerdişê buroyê Kurdistan û Tirkîya benê. Cinî bi tilîlî, govende, çepik û slogananê xo tewrê akerdişê buroyan benê. 

 

Taxa Bahçivan a Rayîrê Armûşî ya Wanî de buroyê Partîya Çep a Keske ame akerdiş. Ma uca de mîkrofonê xo dergê cinîyanê ke tewrê akerdişî bîyî, kerd.

 

'No weçînayîş seba cinîyanê kurdan wayîrê girîngîyêk tarîxî yo'

 

Mehtap Dinçer, dîyar kerd ê mîyanê prosesêkê girîng ê weçînayîşî de yê û wina vat: "Kotayê Partîya Çep a Keske cinîyan rê visnaya, girîng a. Cinîyî perçeyêk girîng ê nê têkoşînî yê. Beyanameyê weçînayîşî yê cinîyan de ameyo vatiş ke do Peymana Stenbolî reyna bîyarê. No xeylêk baş o. Partîya Çep a Keske vata do meaş bidê cinîyan. Bi taybetî cinîyê Kurdistanî hetê ekonomî de zehmetîyan ancenê. Coka zî na babete de ardî rojeve."

 

'Do cinî zorê nê sîstemê faşîst berê'

 

Mehtape veng da ke pêro cinîyî dorê Partîya Çep a Keske bêrê têhet û wina vat: "Do cinîyî dorê Partîya Çep a Keske de bêrê têhet û serbikewê. Do cinîyî zorê nê sîstemê faşîst ê AKP-MHPyî berê."

 

'Her tim alternatîfê ma yê diyîn esto'

 

Emine Umar da zanayîş ke aye sey welatijê Kurdistanî paştdayîş danê Partîya Çep a Keske û vat, partîya ma ya verê HDP bî la seba tedayê îqtidarî mecbûr ameye verdayîş ke partî bêra vurnayîş, her tim alternatîfê ma yê diyîn esto. Emîne vat: "Ma do sey welatijê Kurdistanî paştdayîş bidê partîya ke temsîlkarîya ercanê ma kena."

 

Hamîde Orenci zî da zanayîş ke vernîya kiştişê cinîyan nîno padayîş, coka ê do zî bîyayîşê xo her ca de vejê vernî. Hamîdeye vat, ganî pêro cinî tewrê Partîya Çep a Keske bibê. 

 

Aycan Altin, dîyar kerd ke seba partîya cinîyan a ganî Partîya Çep a Keske bêra weçînayîş û vat: "14ê  Gulane ya ma ya, partîya alternatîf Partiya Çep a Keske ya."

 

Ma kurd ê ma kokê dare yê

 

Feyza Kiliçe da zanayîş ke raya înan raya înan a û vat: "Raya ma Partîya Çep a Keske re ya. Çimê ma sewbîna partîyêk bîn nêvîneno. Waştişê ma oyo ke Partîya Çep a Keske serbikewa. Ma kurd ê, ma kokê dare yê."