Melîke Aydin

 

ÎZMÎR - Mexdura erdlerzî Gulseren Durmaze dîyar kerd ke înan aşma Remezanî xemgîn derbaz kenê û vat ke badê erdlerzî dewlete wezîfeyê xo nêarde ca û vat ke aye heqê xo helal nêkena.

 

Di erdlerzê girdî ke merkezê înan Mereş bî de goreyê dayeyanê fermîyan 50 hezar û 399 hemwelatijî dinyaya xo bedilnayî. Bajarê ke erdlerz tede qewimîya de hema zî lazimîyê şarî nêameyê çareserkerdiş û şertê giran mîyan de hewl danê travmaya erdlerzî serê xo ra bierzê. Cinîya bi nameyê Gulseren Durmaza ke roja yewine ya erdlerzî de Hatayî ra ameya Îzmîrî dîyar kerd ke aşma Remezanî xemgîn vîyarnenê û vat ke dewlete ne Hatay de zî Îzmîr de wezîfeyê xo nêarde ca.

 

‘Ameyêne zanayîş ke do erdlerz pê bêro’ 

 

Guserene dîyar kerd ke keyeyê aye 54 serrî verê cû Mêrdînî ra koçê Îskenderunî kerd û Îskenderun de ê gird bîyî û wina vat: “Ameyêne vatiş ke do Mereş de erdlerzêk bibo la kesêk goş nêda. Awanîya ma rê vatî ke xisar nêdîya û dima ra vatî ke kêm zirar dîya. Ma şîyî serê xirban. Ma nêeşkayî çîyêk bikerê. Mi mîyanê 4 rojan de uca de tena hirê leşkeran dî. Polîsêk zî estbî. Kişta markete BÎMî de bî. Seba ke market nêro talankerdiş uca de bî. Hemwelatijî bi îmkananê xo vinç kîra kerd. Ma roja ewile de şîyî Kizilayî. Ma kon waşt. Ma binê varanî de mendî. Ma tutan kerd mîyanê wesayîtî. Embazê ma zafê înan binê xirban de mendî û serd vera merdî. Roja 4ine de ma şîyî ameyî verê mêrdeyê mi ke Îzmîr de bî.”

 

‘Mi kerdî endama AKPyî’ 

 

Gulserene dewamê qiseykerdişê xo de bale ant ameyîşê xo yê Îzmîrî ser û vat: “Vatî ke eke şima qeydê xo yê AFADî nêvirazî şima do vînîbîyaye biasê. Ma qeymeqamtîya Torbaliyî de qeydê xo viraşt. Qeymeqamtî hezar lire pere da. Hemwelatijî paştî dayî ma. Merdimê ke ma nêşinasnayêne ameyî zîyaretê ma. La dewleta ke ganî berpirsîyarîya xo biardêne ca çinî bî. Mi kerdî endama AKPyî. 9ê Sibate de mesaj mi rê ame. Vatî ke ti bi xêr ameya.”

 

‘Kîra bîya vay’ 

 

Gulserene nê çî vat: “Mêrdeyê mi verê Îzmîr de bi. Ma zî ameyî tîya. Ez seba demêk ameya. La uca de mekteb çin o. Ma uca de keye gêrayî vatî 8-9 hezar. Tîya 3 hezar û 500 o. Ma 5 hezar depozito da. Ma vat, ma herêma erdlerzî ra ameyê, wayîrê banî vato mi eleqeder nêkeno. Hişê ma tim serê Hatayî de yo. Remezan xemgîn derbaz beno. Tutî tîya nêwazenê.  Mi bi zor mektebî de nuşt. Ma hewl danê na travma serê xo ra bierzê. Ma hewl danê qalê erdlerzî nêkerê. Tutê mi xeylê xo zehmetîyan ancenê. Qebûl nêkenê. Embazê tutanê mi merdî. Remezan seba ma zaf zehmet derbaz beno. Dewlete wezîfeyê xo nêard ca. Rewşa welatijê ke Hatay de ciwîyenê qet baş nîya. Banyo çin o. Pêro bi zor derbaz kenê. Şertê înan baş nîyê. Arayî çin a. Market çin o.” 

 

Gulserene peynîya qiseykerdişê xo de dîyar kerd ke dimayê Îzmîr de bi ca bîya, welatijan înan tena nêverdayo û wina qedêna: “Mi sipasiyê xo seba înan kerd. La ez hêrsê xo mahşerî rê verdena. Ez heqê xo helal nêkena. Erdlerzî de kes çinbi. Gûnayê ci zaf pîl o. Xeylêk kesî binê xirbeyan de serdan ra merdî.”