Şehrîban Aslan

 

AMED - Leyla Nergîza ke 7 serrî ya tepişte ya 3 reyan înfazê aye ame veşênayîş û tehlîyekerdişê aye ame astengkerdiş. Keyeyê aye dîyar kerd ke Leyla nêweş a û ganî bi lez peynîya nê caardişan bêro.

 

Heyetê Taqîpkerdiş û Îdare ke sereyê serra 2021î de bi qanûnêk kewt dewre zîndanan de ame awankerdiş, derheqê tepişteyanê sîyasîyan de bi bahaneye sey govend çarnayîş, deyîr vatişî tehqîqatê dîsîplînî akenê, parekerdişê serê çapemenîya dîjîtale yê verêne kerdî û kenê bahaneyê veşênayîşê înfazî. Bi hemkarîya heyetê taqîpkerdişî yê tepişteyan ‘poşmanî’ yeno ferzkerdiş û kitabe ke wanenê, waştişnameyê ke nusenê heme bi hawayêke kêfî bene sebebê cezaya dîsîplînî. Na cezaya dîsîplînî zî atengîya tahlîyeyan xo reyde ana.

 

Yew tepişteya nêweşe ke tahlîyekerdişê aye yeno astengkerdiş Leyla Nergîza ke Zîndanê Cinîyan yê Tarsusî de yena tepiştiş a. Leylaya ke 7 serrî ya tepişte ya 3 reyan înfazê aye ame veşênayîş û tehlîyekerdişê aye ame astengkerdiş. Keyeyê aye derheqê prosesê qedexeyan de qisey kerd.

 

‘Înfazê aye her tim yeno veşênayîş’ 

 

Keye da zanayîş ke Leyla 7 serrî ya tepişte ya û wina vat: “Ganî Leyla 30ê Teşrîna Peyêne ya 2022î de tahliye bibayêne. Tîya ra ver heyet qerar girewtbî û înfaz 3 aşman ame taloqkerdiş. Ganî 28ê Sibate de bivejîyayêne. La reyna heyet kom bîyo û Leylaye ra pers kerdo, vato PKK rêxistina terorî ya yan nê. Leylaye cewabê ‘nê’ daya. Nê semedî ra înfaz reyna ameyo veşênayîş û 6 aşme ameyo taloqkerdiş. Vera ke ceza qedîyaya zî bi hawayêke kêfî serbest nîna verdayîş. Cezaya Leylaye 7 serrî bî. La wazenê bi veşênayîşê înfazan wazenê bivejnî 9 serran.” 

 

‘Heqê dermankerdişî yeno astengkerdiş’

 

Keyeyî bale ant serê nêweşîya Leyla û nê çî vat: “Leyla çaqê xo ra astengdar û birîndar a. Uca de nêeşkena biciwîya. Rewşa weşîya aye baş nîya. Ganî nê caardişê keyfî bêrê wedaritiş. Zîndan de nîna dermankerdiş. Demo ke Sîncan de bîye, ma bi hemkarîya avûkatan, bi hemkarîya parlamenteran emelîyat kerd. Yan do çaqê aye biameyîne tirakerdiş. Emelîyat bî. Platîn vetî. La seba serdî her tim bi enfeksyon kewtêne. Dejê aye zaf bi. Nêeşkayîne wurzo û rûşo. Tuwalet seba alaturkayo nêeşkena bişuxulna. Klozet çinbo probleman ciwîyena.”

 

Venga tahlîyeye

 

Keyeyî wina qedêna: “Dimayê grevê vêşanîye Leyla tewr zêde zehmetî ant. Merdimêke ke cezaya aye qedîyaya bi bahaneyê keyfî yena tepiştiş. No çîyêk  adîlane nîyo. Poşmanî merdiman ferz kenê. Merdimêke hende serrî tepişteya, perse pers kenê. Prosesê erdlerzî de ganî tebera biba. Keye mexdur o ganî seba nê bêra veradayîş.”