HELEB - Hetkarîya ke Silêmanîye de seba Taxa Şêxmeqsûdî ameybî hadrekerdiş ambargo vera yew aşme ra dima resaye vere deste hemwelatijanê taxe.

 

Ambargoya Şamî ya serê Taxa Şexmeqsûdî ya Helebî dewam kena. Vera qewimîyayîş û bobelatê sey erdlerzî ke merkezê ci Mereş bî, reyna zî ambargo dewam kena. Wexto ke erdlerz qewimîya zî xeylê hetkarîyî seba keyeyê ke netîceyê erdlerzî de zirar bi înan ameybî, hetê rêxistinê merdimi ra seba hemwelatijanê taxe ameyî şirawitiş la ambargo vera hetkarî nêameybî derbazkerdiş.

 

Vizêr hetê Rêxistina Nîştîmanî ya Kurdistan û şarê Silêmanîye ra seba hemwelatijanê taxa Şêxmeqsûdî  hetkarî ame şirawitiş. Na hetkarîya ke werd, xoradayîş û betanîye ra pê ameyêne yew aşme ra dima derbazê taxe bî. Hukmatê Şamî qedexe kerdbî ke hetkarî derbazê taxe nêba.