Şehrîban Aslan

 

AMED - Rojnameger Neşe Topraka ke zîndan de ya, bi wesîleya 8ê Adarê mektube û fotografê Jîna Emînî ya ke serê laçeke de xêz kerdebî û waşt bierşawa ajansê ma la îdarekarê zîndanî dest dayî serê mektube û laçeka ke resimê Jîna Emîne ser de viraştebî.

 

Zîndananê Kurdistan û Tirkîya de binpaykerdişê heqan ê hemverê tepişteyan de resayo sewîyeya îşkenceyî, nê caardişî roj bi roje zêde benê. Zîndanê Padeyeyê Cinîyan ê Amedî yew zîndano ke binpaykerdişê heqan ci de zêde benê yo.  Rojnamegere Neşe Topraka ke zîndan de tepişte ya, bi wesîleya 8ê Adare Roja Cinîyanê Dinya resimê Jîna Emînî serê laçeke de xêz kerdebî û waştebî bierşawa ajansê ma. La îdarekarê zîndanî dest da serê laçeka ke resimê Jîna Emînî ser de estbî.

 

Rojnamegere Neşe derheqê babete de muracatê  Dadgeha Înfazî ya Amedî kerd û muracatê aye ame redkerdiş. Dadgehe wina cewab da Neşe: "Mîyanê mektube de laçekêke spî ke resimê cinîyêke ser de estbî, hetê komîsyonê ma ra ameye vînayîş. Netîceyê cigêrayîşê ma de ame vînayîş ke amancê rêxistinbîyayîşî û seba malzemeyê neqlkerdişî, ma sey tehluke vînenê. Seba nê zî ma muracatê aye red kenê."

 

Neşe, dima ra waştişnameyêk şirawit Dadgerîya Înfazî ya Amedî û waştiş kerd ke mektube û laçeke îade bikerê. Waştişnameyê Neşeye de no çî ca girewt: "Ez resam a. Mi senîn karê xo teber de kerdêne, nika zîndan de zî eynî karî kena. Resimo ke mi xêz kerd û mektuba ke mi nuşte, ganî nêbo sebebê cezaya dîsîplînî. Mektube û resim de şîdet, sûcdarî û heqaret çin o. Sey tepişteyêke, bi fikrêk azad mi resim xêz kerd û hewce nîyo ke qerarê cezaya dîsîplînî bêro dayîş. 

 

Ez wazena ke no qerarê dîsîplînî bêro wedaritiş û mektube û resimê ke mi xêz kerdo îadeyê mi bikerê.”