Dîlan Babat 

 

HATAY - Qezaya Samandagî ya Hatayî de xirbê awanîyê rijîyayeyî taxa Yeşîlkoyî ya dekewtişê qeza û Raşteyê Mîheyla Kuşî de ameyî vengkerdiş. Cinîyan reaksîyon mojna rewşe û dîyar kerdî ke seba ke cuya xo pawitî kuyayîş werdî û vatî ke gelo cuya merdimî hende ercan a?

 

Erdlerzo ke merkezê ci Mereş bî û 11 bajaran de tesîr viraşt sero ra 2 aşme derbaz bî. Bajarê ke tewr zêde tede rijîyayîş pê ame ra yew zî Hatay bî. Xirbê ke merkezê Hatayî ra yene wedaritiş erzîyenê raşteyê cuye. Nê xirbî cuya merdiman kenê tehluke.

 

Nêweşîyê astim û kuxikî dest pêkerdo

 

Qezaya Samandagî ya Hatayî de xirbê awanîyê rijîyayeyî taxa Yeşîlkoyî ya dekewtişê qeza û Raşteyê Mîheyla Kuşî de ameyî vengkerdiş. Rijnayîşê xirban ra dima hemwelatijê ke konan de manenê de nêweşîyê sey astim û kuxikî dest pêkerd. Hemwelatijî vera caardişan de dest bi nobeta cuye kerd la leşkeran şîdet bi înan mojna û înan destbend kerdî. Şar dîyar kerd ke heta ke xirbî nêrî wedaritiş do xover bidê.

 

‘Seba ke ma cuya xo pawenê ma kuyayîş wenê’

 

Gulbeyaz Ergune dîyar kerd ke erdlerzî ra dima şar problemê xeylê zehmetinan ciwîya û merdimanê xo vînî kerd û vat: “Nika zî nê xirbî vejîyayî. Vera hende zor û zehmetîyan eno vejîya raşte. No 10 roje yo ke ma xover danê. Ma şîyî walîtîye. Ma soz girewt. La sozê xo nêard ca. Xirbê tîya vila kene. Gelo cuya merdimi hende ercan a? Ma xover danê la ma şîdet vînenê. Ma kuyayîş wenê.” 

 

‘Qey her tim ma bimirê’ 

 

Gulbeyaze dewam de dîyar kerd heta nê xirbeyî raşteyê cuye ra nêrê wedaritiş, do xo ver bidê û wina vat: “Tîya wareyê cuye yo. Çimeyê debara ma citkarî yo. Ça biewnê merdimî ciwîyenê. Qey her tim ma bimirê. Ma do heta peynî xo ver bidê.”

 

Cinîya bi nameyê Bedîa Ergun zî dîyar kerd ke nobeta vizêr ameya girewtiş de di tutê aye ameyê destbendkerdiş û wina vat: “Tutê mi seba cuya xo têkoşîn kenê. Tîya merdim seba cuya xo pawenê, seba tutanê xo pawenê yenê destbendkerdiş. La ma do seba cuya xo heta peynî têkoşîn bikerê. Hem weşîya ma, hem çimeyê debara ma destê ma ra gênê. La ma do seba ameyoxê xo xo ver bidê.”