Marta Somek

 

STENBOL - Hemsereka Koma Têkoşînê Huqûqî yê Mîyanneteweyîye / Merkezê Demokrasî û Cigêrayîşî Mîchale Arrîcale dîyar kerd ke ganî tecrîdo giran yê serê Rayberê PKKyî Abdullah Ocalanî bibo rojeva her kesî û veng daye ke ganî komelê mîyanneteweyîye seba azadîya Ocalanî bikewo mîyanê têgêrayîşî.

 

Rayberê PKKyî Abdullah Ocalano ke 24 serrî yo Îmrali de binê tecrîdêk giran de yeno tepiştiş 25ê Adara 2021î ra nata ci ra xebere nîna girewtiş. Vera pêro muracatan bi hawayêk kêfî pêvînayîş yeno qedexekerdiş. Seba ke Abdullah Ocalanî reyde pêvînayîş pê bêro her cayê dinya de avûkatî wezîrîya edaletî rê mektube şirawitî û muracatê Serdozgerîya Komare ya Bursa û wezîrîya edaletî kerdî.

 

Seba azadîya fîzîkî hewl danê

 

Hemsereka Koma Têkoşînê Huqûqî yê Mîyanneteweyîye / Merkezê Demokrasî û Cigêrayîşî Mîchale Arrîcale ke aye zî îmze eşte mektuba ke seba wedaritişê tecrîdî 22 welatan ra 350 avûkatî 14ê êlula 2022î de şirawitî Wezîrîya Edaletî rê huqûqnasê ke seba azadîya Rayberê PKKyî hewl danê ra yew a. Mîchale tewrê zîyaretê Delegasyonê Mîyanneteweyî yê Vera Tecrîdî ke 25-27ê Çeleyî de Amed, Stenbol û Anqara de zîyaretan pê ardbî de ca girewte. 

 

Mîchele ke aye zî heyetû zîyaretî de ca girewtêne derheqê azadîya fîzîkî ya Abdullah Ocalan û çîyê ke ganî komelê mîyanneteweyî bikero de qisey kerd.

 

‘Ganî tecrîd bibo rojeva her kesî’

 

Mîchela da zanayîş ke ganî tecrîdo giran ê serê Rayberê PKKyî bikewo rojeva her kesî û wina vat:  “Vîrardişê rojbîyayîşê Ocalanî, seba bale biancîyo serê tecrîd û îzolasyonî muhîm o. Nê prosesî de no zaf muhîm o. Seba ke di serrî yo tu zanayîş ci ra nîno girewtiş û seba rewşa ey endîşe estê. Bi di serrî yo  mekanîzmayê mîyanneteweyî zî ker û lal ê. Dewleta tirke û CPT ke tu agahî nêdanê, na babete de agahdar ê. Seba nê ganî tecrîd bibo rojeva her kesî.”

 

‘Komelê mîyanneteweyî ganî bêveng nêmano’

 

Mîchela dîyar kerd ke komelê mîyanneteweyî ganî bêveng nêmano û wina vat: “Ganî komelê mîyanneteweyî waştiş bikerê ke tecrîdê serê Ocalanî peynî bikerê. Ganî babeta heqan de sîstem bêro rastkerdiş. Ocalan tepişteyêk sîyasî yo. Ganî komelê mîyanneteweyî nê ra haydar bo û PKK lîsteyê 'terorî' ra vejo û prosesê depolîtîzasyon (siyaset ra dûr) bido destpêkerdiş. Ganî komelê mîyanneteweyî bêveng nêmano.”

 

‘Erdogan Ocalanî ra terseno’

 

Mîchela dîyar kerd ke serekkomarê AKPyî Tayyîp Erdogan, Abdullah Ocalanî ra terseno û wina qedêna: “Nika Îmraliyî de çar tepişteyî estê û di serrî yo agahî înan ra nîna girewtiş. Avûkatî zî babeta demokrasîye de mexdûr bîyî. Xeylêk pawitoxê Ocalanî ameyî tepiştiş. Waştişê azadîya Ocalanî, waştişê şikinayîşê tecrîdî zî bi sûc. Ez venga komelê mîyanneteweyî kena. Seba huqûq pê bêro, ganî her kes hemverê tecrîdî de vengê xo berz bikero.”