Şehrîban Aslan

 

ANQARA - Hemverfeka Komîsyonê Tutan ya HDPyî Nuray Turkmene derheqê şîdetê hemverê tutan de qisey kerd û vat: “Kanperestîya seserrî eynî wextî de bi polîtîkaya dişminîya tutan bîyayîşê xo cuya komelkî de domnena.”

 

Tirkîya bi taybetî zî Kurdistan de hemverê tutan de şîdetê sîstematîkî yê zaf hetin yenê rayraberdiş. Herême de Ceylan Onkol, Enes Ata, Mahsum Mizrak, Ugur Kaymaz, Efe Tektekîn, Helîn Şen, Cîhat Morgul, Nîhat Kazan û xeylê tutê bînî hetê dewlete ra ameyî qetilkerdiş. Tewr peynî roja Newroza Licê de 5 polîsan îşkence bi tutêk 14 serrî kerdbî.

 

Hemverfeka Komîsyonê Tutan ya Partîya Demokratîke ya Şaran (HDPy) Nuray Turkmene şîdetê dewlete ya serê tutan ercnaye.

 

‘Şîdetê dewlete newe nîyo’

 

Nuraye dîyar kerd ke şîdetê hemverê tutan newe nîyo û amacê înan no yo ke tutan bigêrî binê kontrole xo û wina dewam kerd: “Kanperestîya şîdetî esto. Zîhnîyetê serdest yê camêrdî dişminîya hemverê tutan zî hewêneno. Kanperestîya şîdetê seserran xo bîyayîşê xo paweno. Qezaya Licê ya Amedî de polîsan îşkence bi tutêk 14 serrî kerd. Îşkence roja Newroze ame kerdiş. Ma ewnîyenê îfadeyê 5 polîsan, roja Newroze meşru yena îfadekerdiş. Tutî Roşanê Newroze pîroz kenê. La pîrozkerdişê Newroze meşru yeno îfadekerdiş. Yanî pîrozkerdişê Newroze sey suc yeno îlankerdiş. Bi nê caardişan wazenê ke vernîya pîrozkerdişê Newroze bigîrê. Tut zî îtîraz keno. Tutî rê vanê vaje ‘ez tirk a’. La tut îtîraz keno.”

 

‘Kiştişê tutan bi serran o esto’

 

Nuraye bale ant serê şîdetê dewlete, binpaykerdişê heqan û qetilkerdişê tutan û wina dewam kerd: “No munferît nîyo. No sey polîtîkayêke dewlete dewam keno. Kiştişê tutan bi serran o dewam keno. Bi destê leşker û polîsan tutî yenê qetilkerdiş, şîdet yeno kerdiş. Polîs û leşker mîlîtarîzm û dewlete bi hawayêke xurt sembolîze kenê.”

 

‘Ma do taqîbkerdoxê hedîse bibê’

 

Nuraye, dîyar kerd ke hemverê şîdetê tutan de bi taybetî venga STK yê ke nê wareyî de xebatan de yê, kenê û wina qedêna: “Ganî na rewşe bêra vînayîş. Ma sey Komîsyonê Tutan ê HDPyî do taqîbkerdoxê hedîseyê şîdet û îşkence bibê. Venga ma seba merkezê heqê tutan zî esto. Ganî ê zî taqîbkerdoxê hedîseyê îşkence û şîdetî bibê.”