AMED - Partîya Çep a Keske, HDP, DBP, Tifaqê Kurd ê Azadî û Demokrasî “Deklerasyonê weçînayîşî” eşkera kerd û vat: "Demo ke ma hêzê xo bikerê yew bêşik ma do serbikewê. Bidestkerdişê azadîye girêdayîşê ma ya. Ma do pîya têkoşîn bikerê, ma do pîya serbikewê.

 

Tifaqê Demokrasî û Azadîye yê Kurdan deklarasyonê xo yê weçînayîşî qezaya Pêyasî ya Amedî de bi kombîyayîşêkî eşkera kerd.

 

Hemserekê KCDyî Berdan Ozturk, Hemserekê DBPyî Salîha Aydenîz û Keskîn Bayindir, Hemvervatoxa Partîya Çepe ya Keske Çîgdem Kiliçgun Uçar, Hemserekê HDPyî Mîthat Sancar, Serekê Partîya Azadîye Ayetullah Aşîtî, Serekê Partîya Azadîye û Merdiman (PÎA) Mehmet Kamaç, Serekê Partîya Komunîste ya Kurdistanî Sînan Çîftyurek û Serekê Partîya Sosyalîste ya Kurdîstanî (PSK) Bayram Bozyel tewrê kombîyayîşî bîyî.

 

Deklarasyon de verî bale ameye antene Erdlerzê 6ê Sibate ser û ame îfadekerdene de erdlerz de dewlete erkê xo nêardê ca û peygoşîya dewlete ra qetlîyamêk qewimîyayo.

 

Deklarasyon de ame parekerdene ke nê prosesê weçînayîşî de polîtîkayê înkar û îmha yê vera kurdan bi hawayêkê tewr giranî dewam kenê û şerê vera kurdan bîyo sebebê krîzanê Tirkîya zî. Deklarasyon de ame vatene ke weçînayîşê 14ê Gulane seba çareserîya meseleya kurdan firsendêk o la ganî Tifaqê Miletî seba paştdayîşê kurdan hêverî cewab bido waştişanê kurdan zî. Deklarasyon de ame îfadekerdene ke Tifaqê Demokrasî û Azadîye yê Kurdan wazeno ke heq û waştişê kurdan wa bêrê caardene, berê çareserîya meseleya kurdan bêro akerdiş.

 

Eşkerayîya tirkî Hemsereka Pêroyî ya DBPyî Saliha Aydenîz û ya kurdkî zî Serekê Pêroyî yê PSKyî wend.

 

Salîha, ard ziwan ke ê partî û tevgerê sîyasî ke “Tifaqê Azadî û Demaokrasîyê Kurdî” awan kerdî bi amancê ke weçînayîşê 14ê Gulana 2023ine de îradeyê şarê xo bi xurtî vejê werte û serê na babete de îradeyê xo yê hempar ê têkoşînî nîşan bidê û vat, neqlkerdişê eşkerayîya cêrî seba rayaumûmî wezîfeyêk tarîxî qebûl kenê.

 

Deklarasyon de qerarê ‘têkoşînê hemparî’ ameye îlankerdiş û sebebê nê têkoşînê hemparî wina ameyî rêzkerdiş:

 

”*Ganî nasname û estbîyayîşê kurdan bişinasîyê û qanûnan de cabidîyê înan.

 

* Kurdkî ganî dibistanan ra heta zanîngehan warê perwerdeyî de bibo ziwanê perwerdeyî û ziwano resmî.

 

* Ganî kurdî bieşkê pê nameyanê xo û nasnameyê xo rêxistin bibê û xo îfade bikerê.

 

* Ganî kurdî Kurdîstan de bibê wayîrê statuyê xoîdarekerdişî.

 

* Ganî nameyê ê cayanê ke ameyê vurnayîş apey bêrê dayîş.

 

* Gorê kesayetanê kurdan ê tarîxîyan wa bêrê eşkerakerdiş.

 

* Qanûno Bingeyî goreyê têdûştîye ganî newe ra bêro viraştiş.”

 

Deklarasyon de wina ame vatene: ”Tifaqê ma vera qeyûman têkoşînê xo rê do dewam bikero. Tifaqê ma xoverdayîşê Jin, Jiyan, Azadî yê cinîyan ê kurdan selam keno. Tifaqê ma teda û înkarê vera kurd, ereb, armenî, asûrî, azerî û tirkmenî û teda û înkarê vera elewî, sunî, êzidî, xirîstîyan û musewîyan zî red keno. Tifaqê ma wazeno wa tecrîdê vera Birêz Ocalanî bêro wedaritene. Tifaqê ma wayîrê destkewteyanê şarê ma vejîyeno.

 

Vengdayîş

 

Tifaqê ma venga şarê ma dano ke dormeyê Partîya Çepe ya Keske de bêro pêser û 14ê gulane de raya xo bido ci. Serkewtişê ma yê weçînayîşî do bibo bingeyê xîretê ma yê seba yewîya neteweyîye. Ma do pîya têkoşîn bikerê û ser bikewê. Yewîya kurdan azadîya kurdan a.”