STENBOL - Hemsekerê MATUHAYDER û ANYAKAYDERî rojbîyayîş û bîyayîşê Rayberê PKKyî Abdullah Ocalanî bi vatişê sey ‘Bîyayîşê Birêz Ocalanî bîyayîşê şarê Kurdî yo’ ard ziwan ser û dîyar kerd ke sibarojê azadî bi azadîya Ocalanî mumkun o û seba azadîya fîzîkî ya Abdullah Ocalanî vengê têkoşnî kerd.

 

Rayberê PKKyî Abdullah Ocalano ke şarê Kurd ci sey ‘rayber’ qebul keno û hetê şarê cîhanî ra fikr û paradîgmaya ci eleqeyêk gird vîneno, 4ê Nîsana 1949î de dewa Amara ya Xelfetî ya Rihaye de ame dinya. Şarê Kurd û dostê kurdan her 4ê Nîsane de bi coşêk gird rojbîyayîşê ci pîroz kenê.

  

Abdullah Ocalano ke 24 serrî yo Girawa Îmraliyî de bine tecrîdêk giran de yeno tepiştiş, hemverê tecrîdî de têkoşînê xo dewam keno. Mesajê seba Abdullah Ocalanî yê şarê kurd, avûkat, keye û heme şarê dinya zelal o: “Heta ke azadîya fîzîkî ya Abdullah Ocalanî pê bêra ma do têkoşînê xo de israr bikerê, do tecrîdî bişiknê.”

 

Hemsereka Komeleya Paştîdayîş û Hetkarîya Kesê ke Merdimê Xo Vînî Kerdî ya Anatolyaye (ANYAKAYDER) û Komeleya Paştîdayîş û Hetkarîya bi Keyeyê Tepişteyanê Marmaraye Reyde (MATUHAY-DER) derheqê 74ine ya rojbîyayîşê Abdullah Ocalanî de ajansê ma rê qisey kerd.

 

‘Rayberê şaran o’ 

 

Hemsereka ANYAKAYDERe Evîn Gençe dîyar kerd ke înan rojbîyayîşê Abdullah Ocalanî pîroz kenê û wina vat: “Ma rojbîyayîşê ci pîroz kenê û heto bîn de zî binê tecrîdêk giran de yo. O raybero ke hetê şaran ra ameyo qebulkerdiş ra yo. Coka ra rojbîyayîşê ci muhîm a. Bi fikr, raybaz, vindetişê xo zerrîya şarî de ca girewto. Bîyayîşê ci xeylê muhîm o. Hemverê tecrîdêk giran de her tim waştişê azadîya fîzîkî kerdo. Bi serran hêzê mîyanneteyewî û rayaumûmî hemverê waştişê Abdullah Ocalan, şaran, keye û avûkatan de ker û lal mendî. No nîno qebulkerdiş. Ganî heme rayaumûmî bi lez bikewo mîyanê têgêrayîşî.”

 

‘Azadîya ci do heme şaran ser de tesîr viraza’

 

Evîne qiseykerdişê xo yê peyênan de nê çîyan ard ziwan ser: “24 serrî yo ke Ocalanî ser de tecrîd yeno rayraberdiş û heme zîndanan ser de tesîr viraşto. Qet şik çin o ke serê heme şaran û cinîyan de zî keno. Azadîya fîzîkî ya Ocalanî do heme şaran ser de tesîr viraza. Ez veng dana heme şaran ke ma rêxistinbîyayîşê xo gird bikerê, tecrîdê serê Ocalanî bişiknê û seba azadîya fîzîkî pîya têkoşîn bikerê. Ganî seba cuya azad û ercaye ma pîya rayra şêrê.”

 

‘Bîyayîşê ci bîyayîşê şarê kurdî yo’

 

Hemsereka MATUHAYDERî Dîlek Demîre zî da zanayîş ke aştîya şarê kurd û şarê Rojhelato Mîyanênî de rolê Rayberê PKKyî xeylê muhîm o û wina vat: “Di serrî yo ke ci ra tu xeberêk nîna girewtiş. No zî yeno manaya de şerî de israrkerdiş. Şarê kurdî yeno înkarkerdiş. Birêz Ocalan cuya xo da serê şarê kurdî. Bîyayîşê ci bîyayîşê şarê kurdî yo. Abdullah Ocalan seba şarê kurdî xeta sûre yo.”

 

'Yewine çareserî peynîkerdişê tecrîdî yo'

 

Dîleke qiseykerdişê xo yê peyênan de nê çîyan vat: “No di serrî yo şar, keye û avûkatî seba pêvînayîşî muracat kenê. La çi heyfo ke îqtîdar nê muracatan û waştişan nêano ca. Yewine çareserî peynîkerdişê tecrîdî yo. Mekanîzma û hêzê mîyanneteweyî zî di rî yê. Hemverê tecrîdê serê Ocalanî de tu mudaxaleya înan çin a. Wezîfeyo ke keweno serê mile rayaumûmî wayîrvejîyayîşê Abdullah Ocalanî yo. Ganî wayîrê ci bêro vejîyayîş. Azadîya serekkatîye azadîya şarê kurdî ya. Azadîya komelî azadîya ci ra derbaz bena. Wa rojbîyayîşê ci yê 74ine şarê kurdî rê pîroz bo.”