RIHA - Çalakîya Nobeta Edaletî ya keyeyê Şenyaşarî roja 741ine de dewam kena. Keye, çalakîya ewro de nê mesajî pare kerd: "Lazimîyê ma çiqas bi awe û hewa bo, hende zî seba azadî, seyyewbînî û edaletî esto."

 

Merdim û pawitoxê Parlamenterê AKPyî yê Rihayî Îbrahîm Halîl Yildiz 14ê hezîrana 2018ine de qezaya Pirsûsî ya Rihayî de hêrişê keyeyê Şenyaşar kerd. Netîceyê hêrişî de mêrde û di lajê Emîne Şenyaşare ameyî qetilkerdiş. Nê ser de Emîne Şenyaşar û lajê aye Ferît Şenyaşar 9ê adara 2021ine de vernîya Edlîyeyê Rihayî de dest bi çalakîya Nobeta Edaletî kerdî. Çalakîya keyeyê Şenyaşarî roja 741ine de dewam kena. Seba ke edlîye paynîya hewteyî de anêbeno, keyeyî çalakî banê xo yê Pirsûsî de dewam kerd.

 

Keye, derheqê çalakîye de serê hesabê xo yê medyaya dîjîtale de nê mesajî pare kerd: "Şert û mercî çiqas giran benê wa bibê, ganî ma nê sîstemo ke hukm sey çuwa destê xo de xebitneno, bivurnê. Lazimîya ma çiqas awe û hewa bibo, hende zî seba azadî, seyyewbînî û edaletî esto. Ma do pîya demokrasî û edalet bîyarê nê welatî."