MERKEZÊ XEBERAN - Evîn Buldane rojaneyê xo de vatêne: "Gurbetelliye nîşanê ma da ke rastî tarîtî de nêmanenê û têkoşîno pîl senîn yeno dayîş, mojna. Ma do qelema aye erd de nêverdê." Nika zî bi seyan rojnamegerê cinî qelema Evîne girewtî û hemverê tarîtî de kewtî pey heqîqetî û vatî, "Ma to xo vîr ra nêkenê."

 

Evîn Buldane yew edîtora Rojnameyê Rojeva Medya ke bi KHKyî ame padayîş bi. Aye 2yê nîsana serra 2017ine de verê berê keyeyê xo de bi krîzê qelbî dinyaya xo bedelnaye. Evîne hema 27 serrî bîye, bi zerrîgermin, nefsqijî û sadebîyayîşê xo ameyîne şinasnayîş. Evîna ke her şert û mercan de tu wext coş û heyecanê xo vînî nêkerdêne, derdûdorê xo rê bîne çimeyê moralî.

 

8 Wargehan vurnenê...

 

Keyeyê Evîne serra 1988ine de, Herêma Federal a Kurdistanî de seba zulmê rejimê Baasî mecbûr manenê ke ca û wareyê xo terk bikerê û verê xo bidê dewa Buryî ya girêdayê Oremarî yê Gevera Colemêrgî. Tîya de bi ca benê. Evîne tîya de yena dinya. Serra 1994ine de keyeyê Evîne seba teda û zordarîyê dewlete mecbûr maneno ke reyke bîn verê xo bido  Herêma Federal a Kurdistanî. Keye dimayê 13 rojan xo resneno Wargehê Multecîyan ê Geliyê Qiyametî yo. Keyeyê Evîne 8 wargeh vurnena û tewr peyîn zî Wargehê Penaberan ê Şehîd Rustem Cûdî (Mexmûrê) bi ca benê.

 

Welatêk azad muxabîrîya azad

 

Evîne tutîya xo de her tim bi zor û zehmetî reyde rî bi rî mendebî la tu wext umudê xo cuye ra nêbirnabi. Evîne mîyanê cuya multecîyî de kede musabî. Girêdayîşê aye yê bi rêxistin û hesasîyetê aye hetê kurd û Kurdistanî de zaf zêde bibi. Evîne waştêne ke welatêk azad de muxabîrîye bikera û no xeyalê aye bi. Embazanê xo ra vatêne: "Belkî ez o nê nêvînî la yê ke pey mi de bimanê do ê bivînê."

 

'Ma mecbûr ê ke ziwanê kurdkî bipawê'

 

Evîne perwerdeyê xo wargeh de dewam kena û dima ra zî derbazê unîversîteya Selahedîn a Hewlêrî bena. Unîversîte de beşê radyo û televîzyonî qedênena. Serra 2011ine de verê xo dana ca û wareyê ke ci de ameya dinya. Evîne, Amed de rojnameyê Azadîya Welatî de dest bi rojnamegerîye kena. Seba Evîne rojnamegerîya bi ziwanê dayîke çîyo tewr esas o û qiseykerdişêk xo de serê girîngîya ziwanî de fikrê xo wina ardibi ziwan: "Ez çîyê ke ameyê ciwîyayîş, bi kurdkî qal kena, şima zî bi tirkî. La ma mecbûr ê ziwanê kurdkî bipawê. Eke ma ziwanê xo nêpawê, ma do qirkerdiş, wêranî, helnayîş û îşxalkerdişî qebûl bikerê.”

 

Gurbetellîye seba rojnamegeran mîrasêk verda

 

Yew zî taqîbkerdoxê Gurbetelliye Evîne, bi qelema xo bî sembolê têkoşînî. Evîne pêvînayêşêk ke 7ê Teşrîna Verêne de Roja Rojnamegerê Kurdî de 2016ine de wina vana: "Gurbetellîye seba rojnamegerê kurdî mirasêk verda û nîşanê ma da ke ganî ma rojê xidar de senîn xo ver bidê. Gurbetellîye eynî wextî de nîşanê ma da ke rastî tarîtî de nêmanena û xoverdayîşêk pîl yeno dayîş. Ma do zî qelema Gurbetellîye erd de nêverdê û tu hêz nêeşkeno hemverê qelema ke heqîqet nusena biba asteng."

 

Hîsgêrîyê aye yê hemverê xebetan

 

Evîne her serrgêra vîrardişê  Nujîyan Erhan, Denîz Firat, Gurbetelî Ersoz û xeylêk rojnamegerê cinî yê têkoşer de waştêne xeberan û portreyê înan viraza. Seba aye na xebatêke taybet bî û zaf bi hîsgêr nêzdîyê xebatê bi nê rengî bîne.

 

Evîna ke seknê xo yê kurdewar û qiseykerdişê bi kurdkî tu wext tawiz nêda her tim nê milî de hesas têgêrayîne. Evîne seba taqîbkerdişê Newroza serra 2017ine verê xo de Raşteyê Newroze ya Amedî. Makîneyê fotografî milê aye de, dest û engiştê aye bi hine, fotografê aye yê peyîn ê taqîbkerdişê xeberan bi.

 

Meslegdarê Evîne, her serrgêra aye de vatişê xo yê "Ma to qet xo vîr ra nêkenê" reyna kenê.