Gulîstan Dursun

 

RIHA - Aktîvîsta TJAyî Hamîde Goktaş dîyar kerd ke Rojbîyayîşê Rayberê PKKyî Abdullah Ocalanî rojbîyayîşê şarî yo û her kesî dawetê rayîr ra şîyayîşê Amara kerd.

 

Rayberê PKKyî Abdullah Ocalan ke 24 serrî yo Îmraliyî de binê tecrîdê giranî de yeno tepiştiş, 25ê Adara 2021ine ra agahî ci ra nîna girewtiş. Pêwa pêro serdayîşan bi hawayêke keyfî yenê qedexekerdiş. Tecrîdê serê Abdullah Ocalanî dewam keno û şarê kurdî nika xo seba 4ê Nîsane rojbîyayîşê Abdullah Ocalanî xo amade keno.

 

Kongreya Komeleya Demokratîke (KCD), Tevgerê Cinîyanê Azadan (TJA), Partîya Herêmê Demokratîk (DBP), Partîya Demokratîka Şaran (HDP), Komeleya Paştdayîşê bi Tepişteyan û Hukmwerdeyan reyde (MED TUHAD FED), eşkerayîye dayî û dîyar kerdî ke do bi wesîleyê 4ê Nîsane rojbîyayîşê Abdullah Ocalan daran ronê, bernameyê cîya bikerê û eynî wextî de rayîr ra şîyayîşê Amara organîze bikerê. Aktîvîsta TJAyî Hamîde Goktaş derheqê rayîr ra şîyayîşê ke bi şîarê ‘Seba azadîye ver bi Amara' do pê bêro de qisey kerd.

 

Rojbîyayîşê şaran...

 

Hamîdeye dîyar kerd ke rojbîyayîşê Abdullah Ocalanî, rojbîyayîşê pêro şaranê bindestan o û wina vat: "Rojbîyayîşê Ocalanî seba cinîyan xeylêk girîng o. 2011ine ra heta nika Xelfetî de pîrozbayî pê yenê. Şar bi coşêk pîl girse pêşwazî kerdêne. Bi hezaran kesî ameyîne Xelefetî. Bi girseyê ke ameyîne reyde şar kêfweş bîne. Metropolê Tirkîya ra xeylêk tirkî ameyîne."

 

Di serrî yo agahî ci ra nîna girewtiş

 

Hamîdeye bale ant serê tecrîdê giran ke 24 serrî yo serê Abdullah Ocalanî de yeno kerdiş û wina vat: "Di serrî yo agahî ci ra nîna girewtiş. Di serrî verê pêvînayîşêk telefonî pê ame. A roje ra agahî ci ra nîna girewtiş. No seba pêro dinya problem o. Tîya de rewşêke zaf giran û zehmet esta. Vernîya ma de 4ê Nîsane esta. Ma şarê xo Xelfetiye de pawenê. Umudê ma oyo ke 4ê Nîsane sey serranê verê bi coş derbaz biba. Ganî şar wayîrê Ocalanî vejîyo. Xeyrê ey rê şar bîyayîşê xo zano."