WAN - Seba 4ê Nîsane rojbîyayîşê Rayberê PKKyî Abdullah Ocalanî emser bi serkêşîya KCD, DBP, TJA, HDP, MED TUHADFEDî ra ver bi Amaraye ra rayîrraşîyayîşêk pê bêro. Amadekarîya rayîr ra şîyayîşî dewam kena. Hetgira Hemserekatîya Pêroyî ya PÎAye Menîce Gulmeze bale ant polîtîkaya tecrîdî ser û dîyar kerd ke tecrîdê serê Abdullah Ocalanî tu hawayî nîno qebulkerdiş.

 

Kurd û dostê kurdan emser zî xo hadre kenê ke 74ine ya rojbîyayîşê Rayberê PKKyî Abdullah Ocalanî ke Îmrali de binê tecrîdo giran de yeno tepiştiş, Îmrali de pîroz bikerê. Kongreya Komelê  Demokratîke (KCD), Têgêrayîşê Cînîyanê Azadan (TJA), Partîya Herêmê Demokratîke (DBP), Partîya Demokratîke ya Şaran (HDP), Komeleya Paştîdayîşê bi Tepişteyan û Keyeyê Tepişteyan Reyde (MED TUHADFED) pîya eşkerayî da û dîyar kerdî ke do bi wesîleya 4ê Nîsane rojbîyayîşê Abdullah Ocalanî de daran bironê, bernameyê cîyayan virazê û fînal de zî rayîr ra şîyayîşê Amaraye pê bîyarê. 

 

Hetgira Hemsereka Pêroyî ya Partîya Azadîyan û Merdimîye (PÎA) Menîce Gulmeze derheqê babete de ajansê ma rê qisey kerd.

 

Hemverê cinîyan yê kurdan de polîtîkaya teda zêde bena

 

Menîceye dîyar kerd ke heta ke têkoşînê bîyayîşê cinîyan bibo do hêrişî bibê û wina dewam kerd: "Badê qeydkerdişê Jîna Emînîye tepiştişê cinîyan, daliqnayîş û hêrişê hemverê cinîyan yê provokasyonan de zêde bîyî. Rejîm hewl dano azadîya cinîyan sînor bikera. Azadîya cinîyan yena manaya lerznayîşê kursîya rejîmî. Ma eşkenê rejîmê Îranî ra yew nimune bidê. Rejîmê Îranê bîyayîşê cinîyan ra terseno. Vinîkerdişî ra tersayî. Coka ra zî verê xo dayî polîtîkaya teda û çonkronayîşî."

 

'Ya ke dîyar kena têkoşînê cinîyan a'

 

Menîceye wina dewam kerd: "Birêz Ocalan seba azadîya cinîyan perspektîf kerd. Vernîya cinîyan akerd. Cinî ser kewte. Cinî bi seserran ra nata têkoşîn kena. Bi taybetî cinîya kurde têkoşînê xo rayra bena. Zafê destkewtişan pê têkoşînî dest fîna. Tabî tîya de tesîrê Ocalanî zêde yo. La têkoşînê cinîyan zî xeylê muhîm o."

 

'Tecrîd nêeşkeno bêro qebulkerdiş'

 

Menîceye da zanayîş ke tecrîdê serê Rayberê PKKyî Abdullah Ocalanî pêroyê komelî ser de tesîr viraşto û na babete de wina vat: "Tecrîdê serê Birêz Ocalanî qet nîno qebulkerdiş. Tecrîd sucê merdimîye yo. Vera ercê merdimîye de yo. Şarê Kurd nê çîyî qebul nêkeno. Tecrîd şexsê Ocalanî de serê heme şaran de ameyo kerdiş. Ganî tecrîd bi lez bêro wedaritiş. Îslamî de ca polîtîkaya tedaye rê çin a. No hemverê heqanê merdiman û hemverê îslamî de yo"

 

'Ez bi zorî tepiştişê cinîyan ca de nêvînena'

 

Menîceye qiseykerdişê xo wina dewam kerd: "Ganî hemverê bawerî, kinc û cuya merdimî de rêzdarî bibo. Îran de xeylê cinîyî nêwazenê sereyê xo bigêrî.  Tirkîya de zî Ewropa de zî nê çîyî wazenê. Ez cinîyêk girewte nêwazena bi zorî çîyêk bêro kerdiş. Bi zor sereyê cinîyan girewtiş mi gore raşt nîyo. Ez hem goreyê bawerî û hem zî goreyê merdimîye nê çîyî raşt nêvînena. Ganî hemverê bawerî, fikr û cuya merdiman rêzdarî bibo."

 

Menîceye peynîya qiseykerdişê xo de bale ant weçînayîşo ke do 14ê Gulane de pê bêro ser û vat: "No weçînayîşê tewr krîtîk yê 20 serran o. Ganî pêroyê şarê ma bibo yew û paştî bidî menfietê xo. Ez seba ameyoxê şarê ma yewîye pêşnîyar kena."