Sema Çaglak

 

ŞIRNEX – Fayrûz Nibata ke dikanê ke Silopî de akerda de kincanê herêmî derznena, hem kulturê kurdî pawena û hem zî debara xo kena.

 

Krîzê ekonomî yê ke seba polîtîkayê îqtîdarî roj bi roje kûr beno, tewr zêde tesîrê xo yê negatîfî cuye ser o keno. Cinîyê ke binê tesîrê krîzî de yê, têkoşînê cuye danê, eynî wextî de hewl danê kulturê xo bipawê. Feyrûz Nibata ke qezaya Silopî ya Şirnexî de dikanê xo yê ke kincanê herêmî derznena, kulturê xo pawena, hemverê krîzê ekonomî yê biyaye xo ver dana.

 

'Mi nêwaşt xo bi keye reyde bi sînor bikerî’

 

Feyrûza ke vernîya 2 aşman qerar daya nê dikanî abikera wina vat: “Vernîya ke nê dikanî abikerî, çend bajarê Tirkîya de bi demê kilm xebityabîya. Dimayê demêk êdî keye de menda. La mi nêwaşt ez bi zereyê keyeyî de bi sînor bimanî û mi qerar da ke ez dikanêk abikerî û pê debara xo bikerî. Prosesê akerdişê dikanî zehmet bi la sewîyeya nika ke ameya, mi kêfweş keno. Gama ke ma dikan akerd, dima ra erdlerz virazîya. Tesîrê erdlerzî zî demêk dewam kerd. Coka karê ma zî vindert. Nika zî hêdî hêdî karê xo bi rêk û pêk kena.”

 

‘Kulturê kincê kurdî vila kena’

 

Feyruze dîyar kerd ke hîna zêde cinîyê ciwanî bala înan serê kincê herêmî ser de yo û vat: “Botan de kulturê kurdî xeylê xurt o. La eynî wextî de no kultur her ke şino qels beno. Coka ra mi waşt ke dikanê kince herêmîyan yê neteweyîyan abikerî ke hem kulturê xo bipawa hem zî pê îdareyê xo bikera. Wexto ke herînayoxê kincan yenê bi kêfweşî ewnîyenê. Ez wazena ke heme bajaranê kurdan de xoradayîşê kincê herêmîyan yê neteweyîyan dewam bikero. Dikanê winasî seba pawitişê nê kulturî îmkan o. Nika tena Kurdistan de kurd nê, hetê Ewropa û bajarê Tirkîya ra zî seba kincê herêmîyan yê neteweyîyan sîparîş yeno û no zî mojneno ke hema bala înan serê kulturê înan de yo.”

 

‘Cinî êdî her raşteyî de yê’

 

Feyruze qiseykerdişê xo yê peyênan de vat ke ganî her cinîye bawerîya xo bi xo bîyara û payanê xo ser de vindera û wina peynî ard: “Cinîya ke payanê xo ser de vindera û xo muhtacê kesêk bîn nêkera na cinîye serfiraz a. Ez kêfweşa ke pê keda deste xo îdareyê xo kena. Tabî esnaftî seba cinîyan zehmet o. la êdî cinî her raşteyê komelî de esta. Gama ke ma ewnîyenê esnafê cinîyî zêde bîyî. Sere de vatêne wa nêxebetîyê, wa biewnê zerreye keyeyê xo la êdî cinî hişyar bîye û nê çîyî qebul nêkena. Ez wazena ke heme cinîyî payanê xo ser de vinderî û wa xo muhtacê yewna kesî nêkera. Cinî yewbînan ra cesaret gênê."