STENBOL - Keyeyê Rayberê PKKyî Abdullah Ocalan, Omer Hayrî Konar, Hamîlî Yildirim û Veysî Aktaşî seba pêvînayîşî muracatê Serdozgerîya Komare ya Bursayî û Mudûrîyê Zîndanê Îmraliyî kerdî.

 

Rayberê PKKyî Abdullah Ocalanî Zîndanê Tîpê Fyê bi Asayîşê Berzî yê Îmraliyî de binê şert û mercê giran ê tecrîdî de yeno tepiştiş û no û no 24 aşmî yo ci ra tu zanayîş nîno girewtiş. Birayê Abdullah Ocalanî, Mehmet Ocalan û wasiyê ci, birayê Omer Hayrî Konar, Alî Konar, birayê Hamîlî Yildirim,  Polat Yildirim û waya Veysî Aktaşî, Melîhe Çetîne seba pêvînayîşî muracatê Serdozgerîya Komare ya Bursayî û Mudurîyê Zîndanê Îmraliyî kerdî.

 

Avûkatî nêameyî agahdarkerdiş

 

Avûkatê Rayberê PKKyî Abdullah Ocalanî hewte ra di rey seba pêvînayîşî muracat kerd labelê ne negatîf û ne zî pozîtîf tu cewab nêame dayîş. Nê ser de 22yê teşrîna peyêne serra 2021ine de bi waştişê “Muracatê lezgîn” muracatê Dadgerîya înfazkerdişê Cezaya  Bursayî kerdî. Dadgerî bi bahaneyê qedexeyê pêvînayîşî bi avûkatan reyde seba 6 aşman ke 12ê teşrîna verêne 2021ine de amebi dayîş û qedexeyê pêvînayîşê bi keyeyî reyde seba 3 aşmî ke 18ê tebaxa 2021ine de amebi dayîş, muracatê avûkatan red kerd. Labelê derheqê sebebê qedexeyî de avûkatî nêameyî agahdarkerdiş.

 

Keyeyî waşt pêvînayîş bêro kerdiş

 

Qedexeyê pêvînayîşê bi keyeyî reyde 18ê teşrîna peyêne serra 2021ine de peynî bi. Pêwa nê zî Serdozgerîya Komare ya Bursayî tu cewab nêame dayîş. Avûkatan 28ê adare de reyna muracatê Dadgerîya Înfazkerdişê Cezayan ê Bursayî kerd. Avûkatan waşt ke pêro astengîyê vernîya pêvînayîşî bi keyeyî reyde bêrê wedaritiş û pêvînayîş bêrê kerdiş. Dadgerî 29ê adare de cewab da muracat û muracat reyna red kerd. Dadgerî sebebê redkerdişî de dîyar kerd ke cezayê neweyî yê disiplînî Abdullah Ocalanî rê ameyê birnayîş û dîyar kerd ke bi nê sebebî do destûrê pêvînayîşî nêro dayîş. Qerarê xo yê redkerdişî de dadgerî wina vat: "Serekîya Heyetê Disiplînî yê Îmraliyî 3yê sibata 2022ine de seba pêro muracatan heta 3 aşman qerarê qedexeyê pêvînayîşî bi keyeyan reyde dayo û no qerar  21ê sibate de qetî bîyo. Coka zî no serewedaritiş ameyo redkerdiş."

 

Rewşa agahînêgirewtişî metodêk îşkenceyî yo

 

Avûkatanê Ocalanî dimayê qerarê redkerdişî yê dadgerî, 12ê adare de bi sebebê ke pêvînayîşê bi keyeyî reyde bi rayîrê cezayê disiplînî yê “bêhuqûqî” yenê astengkerdiş, muracatê Dadgeha Destûrê Bingehîn (AYM) dayî. Muracat de avûkatan bale ant serê rewşa agahînêgirewtişê mutleq (incommunicado) û vatî ke rewşa agahînegirewtiş metodêk îşkenceyî yo û waşt ke AYM tespîtê binpaykerdişê heqê rêzgirewtişê hemverê cuya taybet, heqê pawitiş û muhakemekerdişê adilane û heqê rayîrê muracatêk bitesîr bikero.

 

Ganî pêro astengîyê vernîya pêvînayîşê bi keyeyî reyde bêrê wedaritiş

 

Qerarê qedexeyê pêvînayîşê bi keyeyî reyde ke seba cezaya disiplînî ya 3yê sibate de amebi dayîş, 7ê hezîrane de peynî bîne. Nê ser de avûkatê Ocalanî muracatê Dadgerîya Înfazkerdişê Cezayan a Bursayî kerd. Avûkatan muracatê xo de dîyar kerdî ke demê cezaya disiplînî peynî bîya coka zî ganî pêro astengîyê vernîya pêvînayîşê bi keyeyî reyde bêro wedaritiş û eke cezayê newe yê disiplînî bibi zî na babete de bêrê agahdarkerdiş. Dadgerî rojêke dima cewab da muracatê avûkatan û vat ke cezayê disiplînî hema bi hawayêke fiîlî dewam kenê û bi nê bahaneyî muracatê avûkatan red kerd.

 

Serê redkerdişê muracatî, avûkatan 15ê hezîrane de 1ine Dadgeha Cezaya Giran ya Bursayî îtîraz kerd.

 

Dadgehe 23yê hezîrane de cewabê îtîrazî da

 

Dadgehe 23yê hezîrane de cewabê îtîrazî da. Cewab de dadgehe dîyar kerd ke Serekîya Heyetê Disiplînî yê Zîndanê Îmraliyî 31ê gulane de  Abdullah Ocalan û tepişteyê bînî cezaya displînî yê seba 3 aşman birnayo û îtîraz red kerd.

 

Qedexeyê pêvînayîşî 22yê nîsane de peynî bîne

 

Dadgerîya Înfazkerdişê Cezayan ê Bursayî 12ê teşrîna verêne serra 2021ine de cezaya qedexeyê pêvînayîşê bi avûkatan ê seba 6 aşman dabi Abdullah Ocalanî. Qedexeyê pêvînayîşî 22yê nîsane de peynî bîne. La reyna zî destûr nêame dayîş ke avûkatî bi muwekîlê xo reyde pêvînayîş bikerê. Temamê muracatê avûkatan ê seba pêvînayîşî zî bêcewab ameyî verdayîş. Nê ser de avûkatan 29ê nîsane de reyna muracatê Dadgerîya Înfazkerdişê Cezayan ê Bursayî kerdî. Dadgerî eynî roje de cewab da û waştişê pêvînayîşî reyna red kerd. “Bahaneyê" redkerdişî waştişê pêvînayîşî de ame dîyarkerdiş ke dadgerî 13ê nîsane de seba 6 aşman qerarê qedexeyê pêvînayîşî daya. Derheqê bahaneyê qedexeyî de ancî tu agahî bi avûkatan reyde nêame parekerdiş.

 

Pêvînayîşê bi rayîrê telefonî 

 

Abdullah Ocalan reya ewil 27ê nîsana serra 2020î de eşka karê xo yê pêvînayîşê serê telefonî ra feyde bigîro. Dimayê ke derheqê Abdullah Ocalanî de serê medyaya dîjîtale de çendêk agahî ameyî parekerdiş, reaksîyonê rayaumumî zêde bî. Bi pîlbîyayîşê reaksîyonan reyde Abdullah Ocalan 25ê adara 2021ine de bi birayê xo Mehmet Ocalan reyde serê telefonî de qisey kerd. Labelê Mehmet Ocalan da zanayîş ke pêvînayîşê înan nîme de ameyo birnayîş.

 

Hîrê serrî yo pêvînayîş nêameyo kerdiş

 

Avûkatê Abdullah Ocalanî, Rezan Sarica û Newroz Uysale dimayê 8 serran, tewr peyîn 2-22yê gulane, 12-18ê hezîrane û 7ê tebaxa serra 2019ine de eşkabî bi muwekîlê xo reyde pêvînayîş bikerê. A roje ra heta nika zî destûrê pêvînayîşî nîno dayîş.