STENBOL - Tepişteya nêweşe Dîlek Oza ke Zîndanê Bakirkoyî de tepişte ya 28 serrî yo ke vera neweşîya aye ya zerrî, astim, polik, gurçik û tansîyonî serbest nîna verdayîş. Yewine waştişê dayîka aye no yo ke kênaya aye serbert bêra verdayîş.

 

Dîlek Oze 28 serrî verê cû wexto ke 25 serrî ya xo de Unîversîteya Marmara de Beşê rojnamegerîye wendêne, Anqara de ameye tepiştiş. 20 serrê tepiştişê xo de xeylê îşkenceyan dî. Dîleke Anqaraye ra berdî Stenbol û Mehkemaya Asayîşê Dewlete  (DGM) de ameye muhakemekerdiş. 36 serrî cezaya muebeto giran aye rê ameye birnayîş.

 

Yewine xeyalê aye rojnamegerî bî

 

Dîleke serra ke biba mezune ameye tepiştiş. Xeyalê aye rojnamegerî bî. Dîleke sere de Zîndanê Bayrampaşayî de tepişte manena û dima ra surgunê Gebze û Burdurî bena. Tewr peynî zî surgunê Bakirkoyî yena kerdiş. 1994î ra heta nika xeylê nêweşîyan reyde têkoşîn dana. Goreyê dayeye Komeleya Heqanê Merdiman (ÎHD) Dîleke yew tepişteya nêweşe ya giranan ra ya. vera heme hewldayîşan zî serbest nîna verdayîş. Embaza Dîleke ya ke 2018î de Bakirkoyî de têhet de yew qawişêk de bî û nêwaşte nameye xo bida dîyar kerd ke Dîleke vera heme nêweşîyan merdimêk pozîtîf bî.

 

Hemrayêya aye…

 

Embaza Dîleke bale ant hemrayîya aye ser û wina vat: “Ma 2018î de pîya qawişêk de mendêne. Dîleke kanserê rahîmî bî. Emelîyat bî. Vera heme nêweşîyan rîyê aye timî huyayêne. Enerjîya aye pozîtîf bî. Embazîya aye zaf weş bî. Embazanê xo kêfweş kerdêne. Nêweşîya xo vera aye wext tewrê grevî nêbîbî. La bi embazanê xo yê kewtbî grevî reyde eleqedar bîyêne.”

 

Bi gitar û kalemê xo her kesî heyran verdayêne

 

Embaza Dîleke wina dewam kerd: “Wexto ke ma kişta yewbînan de bî 48 serrî bî. Vera nêweşîyanê xo embazanê xo reyde voleybol kay kerdêne. Her kesî wirznayêne vatêne kay bikerêne. Cinîyêka têkoşer bî. Tesîrêk gird ma ser de kerdêne. Goşdarîya embaznê xo kerdêne. Qet veng nêvindertêne. Bi taybetî embazê ciwanan reyde eleqedar bîyêne. Kurdîya aye zaf baş nêbî, coka ra tirkî nuştêne. Bi gîtar û kalemê xo ma heyran verdayêne. Cinîyêka xeylê xurt bî. Seba embazanê xo şewê moralî pê ardêne. Her tim gitar piro dayene. Deyîran viraştêne. Zaf fedakar bî. Seba heme embazanê xo fedakar bî. Şewe nêrakewtêne seba embazanê xo nobete tepiştêne.”

 

‘Her dişeme paweyê tehlîye bî’

 

Embaza aye dewam de nê çî vat: “Dîleke her rojê dişeme pawitêne ke bêra tehlîyekerdiş. Xeylêk bi kelecan bî. Rojî derbaz bîne, rojê dişeme ameyîne û derbaz bîne. Rojêke ma paweyê tehlîyeyê aye bî la ez tehlîye bîya. Ez zaf xemgîn bîya. Mi vat, werrekna ez nêbîne Dîleke bibayîne. Mi bi Dîleke reyde xeylêk vîrardişan arêda. Embazîya aye zaf cîya bî. Ez her tim embazîya aye hîs kena. Ganî Dîleke lezabez bêra veradayîş û bêra dermankerdiş.”

 

'Yewin waştişê mi oyo ke ez kênaya xo bivîna'

 

Dayîka Dîleke, Suzan Oz zî da zanayîş ke nêweşîyê kênaya aye giran bîyê û wina dewam kerd: “Zîndan de rewşa aye qet baş nîya. Nêeşkena cuya xo dewam bikera. Ganî bêra veradayîş. Yewin waştişê mi oyo ke ez kênaya xo bivîna. 28 serrê aye qedîyayî, 3 serrê aye mendî. 15 serrî yo mîyanê tepişteyê nêweşan de ya. Nêweşîyê aye yê xeylê xo zîndan de vejîyayî. Şertê zîndanî aye danê zorî. Waştişê mi oyo ke kênaya mi ganî bêra veradayîş.”