Sema Çaglak

 

ŞIRNEX - Hemsereka Partîya Çep a Keske ya qezaya Hezexî Elfesya Nas, dîyar kerd ke Partîya Çep a Keske rolêk tarîxî girewta serê milê xo û vat: “Weçînayîş de do cinî û ciwanî nê îqtîdarî ra hesab bipersê.”

 

Weçînayîşê 14ê Gulane rê demêk nêzdî mend. Ver bi weçînayîşî reyde hereket û tevgerê partîyê sîyasî zî tewr lez benê. HDP zî emser seba tehlukeyê ke beno bêro padayîş bi Partiya Çep a Keske reyde tewrê weçînayîşî beno. Partîya Çep a Keske zî ke pêro amadekarîyê xo yê seba weçînayîşî kena, vizêr zî beyannameyê xo yê weçînayîşî eşkera kerd. Sewbîna partî sloganê xo yê seba weçînayîşî zî dîyar kerd û şinasnayîşê deyîra xo ya weçînayîşî zî kerd. 

 

 Hemsereka Partîya Çep a Keske ya qezaya Hezexê Şirnexî Elfesya Nas derheqê kar û xebatê xo de qisey kerd.

 

‘Rolê Partîya Çep a Keske muhîm o’

 

Elfesya, dîyar kerd ke çimê şaran Partîya Çep a Keske de yo û vat: “Partîya Çep a Keske 26ê Adare de kombîyayîşê xo yê pêroyî pê ard û bernameyê xo eşkera kerd. Hemverê rejîmê yew camêrdî do Partîya Çep a Keske têkoşîn bikero. Coka Partîya Çep a Keske rol û mîsyonêk xeylêk pîl girewta serê milê xo. Weçînayîş de yê ke serbikewê û vînî bikerê do partîya Çep a Keske dîyar bikera. Rolê Partîya Çep a Keske rolêk tarîxî yo.”

 

‘Ma do nê hukmatî bin bifînê’

 

Elfesya dîyar kerd ke îdîayê înan gird o, xo ra bawerê û wina qala taybetmendîyê partîye kerd: “Sîyasetê ma sîyasetê şarî yo. Ma olçu û prensîbê xo goreyê nê rayra benê. Nê prosesê peynî de raştîya îqtîdarî bi hawayêk zelal vejîya raşte. Erdlerzî de zî îqtîdar menfîetê xo yê rantî vet raşte. Hemverê nê nizdîbîyayîşê îqtîdaro yew camêrdî, HDP, cinî, ciwan û her beşê komelî nizdîbîyayîşê xo mojna. Ma na bawerîye de yî ke ma do weçînayîş de nê hukmatî bin bifînî û serkewtiş bîyarî nê welatî.”

 

‘Cinî û ciwanî do hesab bipersê’

 

Elfesyaye bale ant rolê ciwan û cinîyan zî ser û wina dewam kerd “Weçînayîşî de do bi se hezaran ciwanî ray bierzê.  Newroza emserî de ame dîyîş ke seba nê îqtîdarî vatişê ciwanan esto. Ameyoxê ciwanan ameyo diznayîş. Perwerdeyî ra bigîrê heta cuya komelkî ciwan bi qedera xo reyde rî bi rî ameyî verdayîş. Sewbîna zî cinî eynî tewir weçînayîş de wayîrê rolê dîyarker a. Çike no hukmat vîşêrê dişmentîye û qetilkerdişê cinîyan rê rayîr akerdiş tu çîyêk bîn nêkerd. Weçînayîş de do cinî û ciwanî do no îqtîdarî ra hesab bipersê.”

 

‘Seba Botanî îddîayê ma tewr kêm 4 parlementer ê’

 

Elfesyaye dewamê qiseykerdişê xo de qala xebata Partîya Çep a Keskan ya Herêma Botanî zî kerd û wina vat: “Xebata ma ya weçînayîşî ya Botanî bêmaben dewam kena. Qaseyo ke deste ma ra yeno ma xo resnenê her raşteyî. Xora Herêma Botanî bi serran o ke kaleya HDPyî ya. Çike herême de têkilîya şar û HDPyî xurt a. Wexto ke ame eşkerakerdiş ke HDP do Partîya Çep a Keskan reyde dekewo weçînayîş, şarê Botanî sey nizdîbîyayîşî HDPyî wayîrê Partîya Çep a Keskan vejîya. Her ke şina rêxistina Partîya Çep a Keskan vila bena. Ma 8ê Adare û Newroze de dî ke beyraqa Partîya Çep a Keskan her raşteyan xemilnaya. Ma prosesê verênan de Botan de seba HDPyî 3 parlementeran vete û emser îdîayê ma esto ke ma do herêma Botanî ra tewr tay 4 parlementeran bivejnê.”

 

‘Ma do bibê vengê ekolojîye’

 

Elfesyaye peynîya qiseykerdişê xo de ard ziwan ke Partîya Çep a Keskan eynî wextî de do biba vengê ekolojîye û vat: “Partîya Çep a Keskan eynî wextî de renge ekolojîye ya. Herêma Kurdistan û Tirkîya de talankerdişê xozaye dewam keno. Ma do sey partîye xebata xo seba pawitişê xozaye zî bikerê. Hem bi renge xo û hem zî bi vengê xo ma vernîya talankerdişê xozaye gênê. Partîya Çep a Keskan tena vengê kurdan nê, vengê heme şaranê Tirkîya ya. Sey partîye ma destê xo kerd binê kerra û ma do berpirsîyarîya xo bîyarî ca. Ma veng danê heme şaran ke bêrê ma pîya nê hukmatî bin bifînê.”