Melîke Aydin

 

ÎZMÎR - Endama Koalîasyonê Edeletî yê Îklîmî Cemîle Kaçara şî zîyaretê kooperatîfê cinîyan ê Hatayî û vat ke zirarê ekonomî û manevî yê Hatayî eşkeno bi zincîrê paştîdayîşî bêro çareserkerdiş û berardiş eşkeno paştî bido kesê ke tepîya agêrê.

 

Koalîasyonê Edeletî yê Îklîmî rojanê verênan de qezaya Samandagî ya Hatayî de Kooperatîfê Cinîyan yê Samandagî û Defneye ziyaret kerd û problemê hemwelatîyan yê herême goşdarî kerd. Endama koalîasyon û zerrîwaza Kooperatîfê Yerdenîz û Goztepe Cemîle Kaçare muşahadeyê xo ma reyde pare kerd.

Cemîleye dîyar kerd ke bi taybetî merkezê berardişî yê kooperatîf û îmalatxaneyan gêrayî û netîceyê ci de dîyî ke xeylê kelepulê beradiş û çîyanê bînan êdî nêeşkenê bêrê şuxulnayîş û makînayê wuşkkerdişê sebze û fêkîyan zî zirarêk gird dîyo. Cemîleye wina dewam kerd: “Awanîya hirê kooperatîfan de xisarêk cidî çinî bî. Hetê weşîye de cam şuxulnayêne. Heme çîyî dekewtbî têmîyan û zirarêk gird dîbî.”

 

‘Hewldayîşê beradişî esto’

 

Cemîleye qiseykerdişê xo de vat ke cinîyan erdlerzo yewine de hewl da ke zirarê îmalatxaneyî çareser bikerî la erdlerzo diyîne de ters cuye bî û wina domna: “Tersayêne. Zîyaretê Kooperatîfê Cinîyan yê Defneye de ma zî erdlerzî dî. Ma babeta beradişî de ganî bibê hetkar. Eke şarê tîya garantîyêk hîs bikero do bikewo hewldayîşê mîyanê beradişî. Ma nêfikirîyenê ke dewlete paştîdayîşêk bida. Eke nê herêman de berardiş bibo do waştiş zî bibo û agêrayîş zî dest pêbikero.”

 

Cemîleye tewr peynî dîyar kerd ke hetê rêxistinbîyayîş û paştîdayîşê cinîyan de eşkenê destpêkêk bibo û sey Kooperatîfê Yerdenîz û Goztepe amacê înan no yo ke beradişê kooperatîfê cinîyê berardoxkeran bigêrî û bajar de bidê naskerdiş. Cemileye wina peynî ard: “Na babete de ganî ma îmkanan awan bikerê. Ma berardişan de nê çîyî dî. Komêk merdim seba ke kon çinî bî serayan de mend. Xeylê şitlê sebze û fêkîyan vêşayî. Aşma nîsane de tîya de bostan yeno ronayîş. Ganî ma toximê Yadîgar biresnê kerdoxkeranê herême.”