Dîlan Babat

 

HATAY - Gulnaz Gumuşa Samandagi de keyeyê aye rijîya û bazara taxê de manena, dîyar kerd ke  şaredarîya CHPyî aşmêke dima ameya serdayîşê înan û Nîmet Kircilar zî da zanayîş ke kona şînî ke ci de mendêne zabîteyan hewl dayo wedarnê.

 

Serê erdlerzo ke merkezê ci Mereş bi reyde aşmêke derbaz bi. Cinîya bi nameyê Gulnaz Gumuşa ke bazarê taxe ya Samandagi de kone da ro wina vat:  “Ma tîya de perişan bîyê. Merdimanê ma dinyaya xo bedelnayî. Qêrînayîşê înan binê xirbeyan de ameyîne ma. Merdimê ma hîrê rojî binê xirbeyan de mendî. Ekîbê xelisnayîşî nêameyî.”

 

 

Gulnaze dîyar kerd ke zamayê înan kênaya xo 6 rojî dima binê xirbeyan ra veto û wina vat: “Ma bi hewldayîşê xo ciwîyenê. Ma nêzanê vînîbîyayeyanê xo rê xemgîn bibê yan zî tersê ke tutê ma ciwîyenê.  Psîkoljîya ma xira bîya. Her çî ma binê xirbeyan de mend. Ma tîya terkê qedera xo ameyî kerdiş. Ma çar kesî kone de manenê. Mêrdeyê mi astengdar o. Mi tutanê xo rê cilî nêdîyî. Hîjyen qet çin o. Şaredarî aşmêke dima ameye tîya. 5 deqeyan nêvinderte. Dima ra şî. Konan ardî la dayî merdimanê xo. Seba welatijanê mexduran tu çîyêk nêkerdî.”

 

Cinîya bi nameyê Nîmet Kircilar zî reaksîyonê xo wina vat: “Ma kone waşt la nêardî. Ma awa şimitişî zî waşt nêdayî. Konê ke dayî reyna peyser girewtî.  Stenbol ra konêke ameye la nika na kone zî wazenê.  Gelo ma do şêrê ça? Tu kes hetkarî nêdano. Ma nêeşkenê sereyê xo buşûyê. Keya zî hetkarî nêdano. Ma tu ca ra hetkarî nêgînê. Konanê şînî awan kerdî. Zabitayî ameyî vatî tîya ra vecîyê.”