WAN - Hemşaredara HDPyî ya Tuşba ya Wanî Ayşe Mînaze mergê şikin yê Wanî ercnaye û vat ke badê tayînkerdişê qeyûman dezgehî ameyî girewtiş û mekanîzmayê ke cinîyî muracat kenê nêmendî û ganî dezgehê cinyan û STO pîya bixebetîtê.

 

Hewteyo peynî de Wan de 2 Colemêrg de yew cinîye bi hawayêko şikin dinyaya xo bedilnayî. Hemşaredara Partîya Demokratîke ya Şaran (HDP) ya Tuşba ya Wanî Ayşe Mînaze mergê derheqê babete de ercnayîşan kerd.

 

Ayşeye dîyar kerd ke Tevgerê Cinîyanê Azadan (TJA) û meclîsê Cinîyan ya HDPyî şîyî zîyaretê wirdî keyeyê cinîyan yê ke bi hawayêko şikin dinyaya xo debilnayî û wina vat: “Barê rojane yê cinîyan giran o. Badê qeyûman zî heme dezgehê aîdê cinîyan ameyî girewtiş. Mekanîzmayê ke cinî muracat bikerî nêmend. Cinî tena ameye verdayîş. Qeyûman ra ver xeta ‘Alo Şîdet, stargehê cinîyan, îstasyonê cuye yê cinîyan’ estbî. La çi heyfo ke heme ameyî girewtiş. Nika tay dezgehî girêdayeyê walîtîye yî. Bê şik nê dezgehî bi mekanîzmayê sîyasî yenê rayraberdiş.”

 

Heta nika tu şikinêk mergê cinîyan nêame dîyîş

 

Ayşeye dewamê ercnayîşanê xo de da zanayîş ke cinîyê Wanî sîstemo ke cuye dano vindarnayîş reyde rî bi rî yî û wina dewam kerd: “Şîdeyê camêrd dewlete tesîrê xo pêroyê cuye ser de kerdo. Ma nêeşkenê cuya xo ya rojane biciwîyî. Bajarê ma de mergê şikin zêdîyayî. Ma sey dezgehê cinîyan û TJAye vanê ke nê cînayetî polîtîk î. Heta nika derheqê mergê şikinan de tu şikinêk nêame tepiştiş.” 

 

Vengê dezgeh û STOyî

 

Ayşeye peynîya qiseykerdişê xo de veng daye heme dezgehê cinîyan û dezgehê komelkî yê sivîlî ke vera mergê şikinan de pîya bikewî mîyanê têgêrayîş û vat: “Eke ma biwazî ke nê mergan kêmî bikerî ganî raşteyan de bibî. Ganî ma xo biresin hîna zêde cinîyan û rêxistina xo awan bikerî. Bi no hawa ma eşkenê mergê şikinan kêmî bikerî.” 

 

Hewteyo peynî de mergê şikinî yê cinîyan wina yî:

 

*Taxa Marmêtî ya Tuşba ya Wanî de 3ê Adare de cinîya bi nameyê Ozlem Karadogan bi hawayêko şikin dinyaya xo bedilnaye.

 

*Taxa Karşiyaka ya girêdayeyê Tubşa ya Wanî de 1ê Adare de ame îdîakerdiş ke cinîya bi nameyê Çîgdem Cansize ya 18 serrî xo kişta.

 

*Dewa Dizê ya Colemêrgî de 5ê Adare de cinîya bi nameyê Zîlan Turane ya 19 serrî keyeyê xo de birîndar ameye dîyîş. Zîlana ke wedarîyaye nêweşxaneyî vera heme mudaxaleyan nêameye xelisnayîş.