Gulîstan Dursun

 

DÎLOK - Hatîceye ard ziwan ke badê di erdlerzê girdî aye û tutê xo perişan bîyî û bale ant paştîdayîşê herêma erdlerzî ser. Hatîceye wina vat: “Ma wayîrê keda xo bivejê. Ma do na cuye pîya mîyanê paştîdayîşî de bi hêz û aqilê xo awan bikerê. Ma do cuya xo wina dewam bikerê.”

 

Di erdlerzê girdî ke merkezê înan Mereş bî û 11 bajaran de ser tesir viraştbî ra yew aşme derbaz bî. Cinîyî nê prosesî de şert û mercê zehmetinan mîyan de têkoşînê cuye danê. Cinîya bi nameyê Hatîceye ke nêwaşt peynameyê camêrdî bişuxulna problemanê cuye û awankerdişê cuyêka newe ercnaye.

 

Hatîceye dîyar kerd ke cinîyî her tim çinî yenê hesibnayîş û wina dewam kerd: “Heta ke cinîyî bêrî binpaykerdiş û îradeyê înan aîdê kesê binan bibo do edalet pê nêro. Cinî erdlerzî de her hetî ra tena mend. Ya ke tutan ana dinya cinî ya, ya ke keye payan ser de tepişena cinî ya. Ya ke herre de çinitiş kena cinî ya. Ya ke keda gird danî zî cinî ya. La serê mezelê înan de zî peynameyê pî û mêrdeyê înan yeno nuştiş. No edaletêk senîn o.”

 

 

Ma do heqanê xo bigêrê

 

Hatîceye da zanayîş ke ê do heqanê xo bigêrê û wina dewam kerd: “Ma do payanê xo ser de vinderê û heqê xo bigêrê. Ma do gamêr tepîya nêerzî. Do îrade, ked, bedenê ma yê ma bibê. Ma do heqanê xo bigêrê. Dimayê erdlerzî cinî û tutî zehmetîyanê girdi antî. Cinî û tutî perişan bîyî. Wexto ke varan vareno awe kewena konan. Ma nêweş kewenê. Tutan nêweş kewtî. Kelepulê ma nêkewenê zerre. Merdim pîser rakewenê. Tuwalet û banyo çin o. Baro giran milê cinîyan ser de maneno.”

 

‘Ma do cuya newe pîya awan bikerê’

 

Hatîceye tewr peynî da zanayîş ke ê do cuya newe pîya awan bikerê û wina peynî ard: “Komelo xozayî de paştîdayîş hîna xurt a. Pere çin o. Ma wina cuyenî. Ganî ma herre ra xizmet bikerê. Herre eşkena ma mird bikera. Ma do cuya newe pîya bi paştîdayîşî awan bikerê. Mîyanê paştîdayîşî de rihê bi rihê paştîdayîşê cuya newe eşkeno bêro awankerdiş.”