Dîlan Babat

 

HATAY - Hemwelatîyê taxa Ataturk ya Samandagî dîyar kerdî ke bi paştîdayîşê zerrîwazan payan ser de yê û bi ameyîşê wisarî reyde sebzeyê ke serayan de ameyî ronayîş çinenê û mabenê yewbînan de pare kenê.

 

Erdlerzo ke merkezê ci Mereş bî ser o ra yew aşme derbaz bî. Na çarçewa de şar bi paştîdayîşê zerrîwazan payan ser de maneno û bi ameyîşê wisarî reyde newebîyayîş xo da hîskerdiş. Cayê ke rinayîş pê ame de resnayîşê serayan zî dest pêkerd. Taxa Ataturk ya Samandagî ya Hatayî ke hema hema ci de awanîyêk payan ser de nêmend de serayê ke vere awanîyan de ameybî ronayîş de zî rewşa rijnayîşî yena fehmkerdiş. Sebzeyê ke serayan de ameyî ronayîş zî dîyenê şarî.

 

Şar terke qederê xo ame kerdiş

 

Cinîya bi nameyê Hulya Karasuye da zanayîş ke aye seraya nizdîyê keyeyê xo yê rijyaye de firingî û xîyaran ronaya û vat: “Wexto ke erdlerz qewimîya hirê roje kesêk nêame. AFAD hirê roje ra tepîya ame. Herkes bi hewldayîşanê xo xirban wedarit. Cenazeyan vet. Yê ke wesayîtê înan estbî şîyî kepçe ardî. AFAD badê 3 rojan ame. 3 roje tîya de kesêk çinî bî.” 

 

Yew aşme seba kone muracat kerdî la hema cewabêk nêameyo dayîş

 

Hulyaye dewamê qiseykerdişê xo de nê çîyan ard ziwan: “Kona ke ma tede yê, dewlete nêda. Merdimê ma yê ke bajaranê bînan de yê ma rê şirawitî. Ma pêro erdlerzan de teber de mendî. Mi seba kone muracat kerd la tu cewabêk nêdayî mi. Nika ma hetê banyo û tuwaletî de problem cuyenî. Reyna merdimê ma konteynir şirawitî. Reyna merdimê ma seba tuwalet û banyo zî konteynir şirawitî. La kanalîzasyon problem o.”

 

Probleme awe dewam keno

 

Hulyaye bale ant kelepulê pakîye ser û wina domna: “Lazimî bi kelepulanê pakîye esta. Ma timî nêeşkenê sereye xo bişuyî. Probleme awe esto. Cereyanê ma hema çin o. Awe çin a. Zerrîwazî yenê depoya ma bi awe pirr kenê. Borîyê awe binê binê xirban de teqayî.”

 

Sera seba şarî bîyî umud

 

Hulyaye qiseykerdişê xo yê peyênan de  vat ke înan şarî ra hende paştîdayîş nêpawitêne û wina vat: “Zerrîwazî yenê, heta ke destê înan ra bêro hetkarîya ma kenî la heta cayêk. Zerrîwazî û welatperwerî zaf hewl danê. La dewlet tu çîyêk nêkerd. Ma hemwelatîyê taxe çi deste ma de bibo ma mabenê yewbînan de pare kenê. Ma wextê xo wina vîyarnenî. Serayê ma estê. Çi bêro tîya ma yewbînan rê pare kenê. No tay bibo zî umud dano şarî.”