RIHA - Hemsereka DADî Kadrîye Dogane çalakîya Nobeta Edaletî ya keyeyê Şenyaşarî de qisey kerd û wina vat: "Eke siba di siba edalet bêro nê welatî, Emîne Şenyaşare raybera nê netîceyî ya. Do heykelê  Emîne Şenyaşare bibo heykelê edaletî.

 

Merdim û pawitoxê Parlamenterê AKPyî yê Rihayî Îbrahîm Halîl Yildiz 14ê hezîrana 2018ine de qezaya Pirsûsî ya Rihayî de hêrişê keyeyê Şenyaşarî kerd. Netîceyê hêrişî de mêrde û di lajê Emîne Şenyaşare ameyî qetilkerdiş. Nê ser de Emîne Şenyaşar û lajê ci Ferît Şenyaşar 9ê adara 2021ine de vernîya Edlîyeyê Rihayî de dest bi çalakîya Nobeta Edaletî kerdî. Çalakîya keyeyê Şenyaşarî roja 717ine de dewam kena. Keye saetê serê sibayî de Pirsûs ra derbazê merkezê Rihayî bi û vernîya edlîye de dest bi çalakîya xo kerd. Çalakî de pankartê “Seba Keyeyê Şenyaşarî Edalet” akerd.

 

Bi wesîleya serrgêra Nobeta Edaletî, Hemsereka Komeleyê Demokratîke yê Elewîyan (DAD) Kadriye Dogane û heyetê aye reyde ameyî serdayîşê keyeyî. Kadrîye, serdayîş de qisey kerd û vat: “Eke siba, di sibayî edalet bêro nê welatî, Emîne Şenyaşare raybera nê netîceyî ya. Do heykelê Emîne Şenyaşar bibo heykelê edaletî. Seba ke Emîne Şenyaşar her roje seba merdimayî û nê welatî waştişê  edaletî kena. Ma herêmanê erdlerzî ra yê û ê herêman de bêedaletî esta. Seba ke nê welatî de hesabê qirkerdiş û bêedaletî nîno perskerdiş, her wext bêadeletî virazêna."

 

Bi wesîleya serrgêra Nobeta Edaletî do ewro vernîya Edlîyeyê Rihayî de kursîya akerde bêra ronayîş. Dima ra zî do Eywana Tahir Elçî ya Baroyê Rihayî de belgefîlmê “Seba Edaletî’ bêro pêşkêşkerdiş ke rejîsorîya ci Elîf Yîgîte kerda û têkoşînê keyeyê Şenyaşarî qal kena.