Sema Çaglak

 

ŞIRNEX - Cinîyê ke tewrê rayîr ra şîyayîşê 8ê Adare ya Silopî bî, dîyar kerdî ke dêsê bindestîyî rijnayî û vatî: "Ma xemgînîya xo ya seba mexdûrê erdlerzî açarnenê hesabperskerdişî."

 

Cinîyan emsar 8ê Adare Roja Cinîyan ê Dinya de bi sloganê, "Dem demê Jin Jîyan Azadîye yo" vakurê Kurdîstanî û Tirkîya de 14 merkezan de bi rayîr ra şîyayîş û eşkerayîyan pêşwazî kerdî. Botan de cinîyan 8ê Adare qezaya Silopîyê Şirnexî de bi rayîrraşîyayîşêk girseyî pîroz kerdî. Cinîyê ke tewrê rayîr ra şîyayîş bî qisey kerdî.

 

‘Ma xemgînî vûrna hesabperskerdişî'

 

Endama Heyetê Dîsîplînî ya HDPyî yê bajarê Şirnexî Nurcan Alturk, dîyar kerd ke ê 8ê Adare bi ruhê paştdayîşî û hesabpersayîşê îqtîdarî pêşwazî kenê û vat: "Seba erdlerzî ma 8ê Adare bi xemgînî pêşwazî kerd. La ma no xemgînîyê xo vurna hêrs û hesappersayîşî. Ma sey cinîyê Botanî û TJAyî yê cinîyan tena nêverdanê û paştdayîşê înan reyde dewam kenê. Xora roja ewilî ra heta nika bi şewe û roje ma nêvindertê û meydanan ê. Ma hetkarî resna cinîyan û paştdayîş da. Dîyar bî ke dewlete bi zanebîyayîş nêşîya cayê erdlerzî. Coka hetê şarî rê hêrsik esto. Welatijan roja ewilî rê persa ‘Dewlete ça de ya' kerdî. La şar hêzê paştdayîşê yewbînan gêno. Ma sey HDPyî zî destpêk ra heta nika tora paştdayîşî xurt kerd û û xebatê xo yê seba cinîyan kerd. Ewro zî ma raşte de bî vengê ê cinîyan."

 

‘Hemverê zulmê têkoşînê cinîyan pîlêr beno'

 

Îdarekarîya HDPyî ya qezaya Qilebanî Ferîde Yaman zî 8ê Adare heme cinîyan pîroz kerd û vat: "Ma a roje dîyarî heme hevalbendanê xo yê zîndanî û cinîyê ke ameyê qetilkerdiş kenê. Her ke zulm û tehda serê cinîyan zêdeyêr beno, ma têkoşînê xo pîlêr bikerê. Heta ke zulm ma rê bêro kerdiş, ma do bi hêzêr bibê. Ez na roje dîyarîya cinîyanê têkoşer û xoverdayox kena."

 

‘Bi yewîya cinîyan aştî mumkin a'

 

Rihan Konute zî ard ziwan ke cinî emsar seba aştî û azadîye raşteyan de bî û vat: “Fikr û dewaya ma pêrûne yew a. Ma aştî, azadî û têduştî wazenê. Nê zulmî rê êdî bes o. Ma wazenê ke kêna, camêrd, ciwan û cinî dest bidê yewbînan û xeleka aştî û azadîye demêk nêzdî de awan bikerê."

 

‘Cinîyan dêsê bindestî rijnayî'

 

Meryem Oruç zî dîyar kerd ke cinîyan êdî dêsê bindestî rijnayê û wina vat: "Ma hemverê qetîlkerdişê cinîyan, hemverê zulmî û seba aştî û azadîye raşteyan de yê. Ça de zulm û zordestî bibo, ganî şar bibo yew û hemverê nê zulmî de bêveng nêmanê. Rojava û Surîye zî erdlerz virazya la tirkîya hêrîşê xo yê serê Rojawanî de dewam kerdî. Hende kesî binê xirbeyan de dinyaya xo bedelnayî kes nêşi hetkarîya înan, qey ê merdim nîyê. Sewbîna zulm û tedayêke pîl serê cinîyan de esto. Cinî ewilî destê bira û pî de tehda vînenê û dimayê ke zewicêna zî camêrdo ke reyde zewicyaya û  xezûrê xo ra zulm vînena. Ma êdî nê çî qebûl nêkenê. Ez seba hemverê nê zulmî vejîyî Cizîr ra ameya. Serê cinî de pêro hêriş û şerê xo yê lêşin kenê. Bedenê cinî teşhîr kenê û qetil kenê. Ma cinî êdî sebra ma înan rê nêmendo. Hemverê nê hemine ma do vengê xo berz bikerê."

 

‘Hemverê polîtîkayê taybetî ma raşteyan de yê'

 

Tewr peyîn Medya Hezer qisey kerd û vat: "Emsar 8ê Adare bi paştdayîş û têkoşîn ame pêşwazîkerdiş. Cinîyan emsar heme rayê xo yê seba raperînî seba cinîyê mexdûrê erdlerzî û seba cinîyê ke hetê camêrddewletî ra ameyî qetilkerdiş. Cinîyî xo kuçeyan de asayîş hîs nêkenê. Cinîyî hemverê polîtîkata şerî de meydnan de yê. Na polîtîka newe nîya, demê vîyarte ra na polîtîka esta û cinîyan hedef gêna. Ganî cinîyê ciwanî hemverê na polîtîkaya lêşine de xo bi rêxistin bikerê û nêrê kayan. Lazim o eke cinîyê ciwanî hemverê caardişê lêşinan hîşyar bibê."