STENBOL - Cinîyî seba kerdişê Rayîr ra şîyayîşê Şewa Femînîste ke do Taksîm de organîze bikerê, venga beşdarbîyayîşî kerdî.

 

Seba wesîleya 8ê Adare Roja Cinîyanê Kedkeran ê Dinya do ewro Taksîmê Stenbolî de Rayîr ra şîyayîşê Şewe ya Femînîste organîze bêrokerdiş. Rayîr ra şîyayîşê Şewe ya Femînîste ya 8ê Adare serê hesabê xo yê twîtterî de dîmenêk 22 sanîyan pê yeno û têkoşînê cinîyan qal keno, sernameyê “Sey her serre ma do emşo zî bi hêrs û serewedaritişê xo raşteyan de bê. Ti zî bê!" pare kerd. Vîdeo de venga pêro cinîyan ame kerdiş ke beşdarê rayîr ra şîyayîşî bibê.

 

Vîdeoyî de sloganê "Biciwîyo têkoşînê ma yê rêxistinkerde” , “Jin, jiyan, azadî” û “Serewedaritişê femînîst” estbî û no vengdayîş ame kerdiş: "Raşte zî, kuçe zî, şewe zî yê ma yê! 8ê Adare de ma do bi hêrs û şînê xo Taksîm de bibê."