ANQARA - Endama Rayîr ra şîyayîşê Cinîyan ê Dinya û Tîfaqê NADAye Khadîja Ryadîye bi wesîleya 8ê Adare Roja Cinîyanê Kedkaran ê Dinya qisey kerd û dîyar kerd ke azadîya cinîyan û azadîya şaran girêdayeyê yewbînan a. 

 

8ê Adare Roja Cinîyanê Kedkaran ê Dinya binê veristîya şer, sîstemo serdest yê camêrd û erdlerzî de yena pêşwazîkerdiş. Cinîyî reyna do raşteyan de waştişanê xo biqîrê.

 

Pawitoxa heqê merdiman, femînîsta Fasî, Sereka Koordînasyonê Heqanê Merdiman Magrîp (Maghreb Human Rights Coordination), endama NADA û endama Rayîr ra şîyayîşê Cinîyan ya Dinyaye Khadija Ryadiye bajarê xo Rabatî ra qala têkoşînê welatê xo û 8ê Adare kerd.

 

Khadîjaye derheqê ekonomîya welatê xo de qisey kerd û dîyar kerd ke ekonomî her ke şina xira bena û wina dewam kerd: “Emserr krîzêk gird esto. Cinîyî raşteyê xebate ra her ke şina yena dûrîkerdiş. Camêrdî se ra 70 yenê îstîhdamkerdiş. Şert û mercê xebate yê xirab tesîrêk gird bi cinîyan ser de keno. Cinî sey hêzo ercan ya karî yena şuxulnayîş.”

 

Nêtêduştî xeylê giran a

 

Khadîjaye qiseykerdişê xo de bale ant tewirê şîdetî ke welatê aye de cinîyan ser de yeno kerdiş ser û wina dewam kerd: “Pawitiş hetê vernîgirewtişê şîdetî de mird nêkeno. Şîdetê ekonomîye ra bigêrêne heta nêtêduştî her raşte de şîdetê fîzîkî, şertê giran yê xebate xeylê binpaykerdişî estê û na lîste wina derg bena. Tedbîrê ke merdiman pawenê xeylê qels ê. Seba têkoşînê hemverê şîdetî 5 serrî verê cû qanûn vejîya la çi heyfo ke rewşe nêbedilîya. Xeylê sendika û komeleyî hemverê şîdet û nêtêduştî de têkoşîn danê. Seba ke qanûn bibedilîyo û sîstemêk newe bêro awankerdiş têkoşîn kenê. Hedefe rêxistinê cinîyan yê Fasî têkoşînê hemverê nêtêduştî yo.”

 

Komîteyê paştîdayîş, kooperatîf û torê paştîdayîşî

 

Khadîjaye dewamê qiseykerdişê xo de da zanayîş ke heme rêxistinê cinîyan dormeyê têkoşînî de bîyî xelek û xo bi rêxistin kenê û wina vat: “Seba bedilnayîşî zextan bi dewlete kenê. Torê rêxistinê cinîyan xebetîyenê. Yew nê rêxisinê ke hemverê nêtêduştî û zextan de têkoşîn dano Sprîng of Dîgnîty Nework o. Rêxistinê cîya yê cinîyan binê banê ‘Koodînasyonê Rayîr ra şîyayîşê Cinîyan ê Dinya’ û Koalîasyonê NADAye de xebetîyenê. Xo bi rêxistin kenê û komîteyê paştîdayîşî awan kenê. Mîyanê nê xebatan de awankerdişê kooperatîfan, komîteyan û torê paştîdayîşî zî estê.”

 

‘8ê Adare îmkan a’

 

Khadîjaye qiseykerdişê xo yê peyênan de 8ê Adare sey îmkanê paştîdayîşî yê seba cinîyan ercnaye û dîyar kerd ke 8ê Adare têkoşînê azadî û ercan a. Khadîjaye wina qedênaye: “Cinîyê Fasî xeylê raşteyan de têkoşîn danê. 8ê Adare seba têkoşînî îmkan a. Cinîyê Fasî hemverê emperyalîzmî de bêmaben têkoşîn danê û paştîdayîşî gird kenê. Azadîya cinîyan û azadîya şaran girêdayeyê yewbînan a. Cinî azad biba do komel zî azad bibo. Heta ke cinîyî bi hawayêke têduştî û adilane tewrê raşteyê cuye nêbê, ameyoxê merdimîye zî do çinî bo.”