HATAY - Esmehan Bostanciye taxa Çekmece ya ke bi paştîdayîşê zerrîwazan payan ser de  ya her serê sibayî zerrîwazan rê qehwe virazena.

 

Mereş de 6ê Sibate de merkezê ci qezaya Bazarcixî de di erdlerzê girdî qewimîyayî û xeylê bajaran de rijîyayîşê girdî qewimîyayî. Nê bajaran ra yew zî Hatay o. Roja yewine ra nata herême de paştîdayîşê şarî zêde ya. Zerrîwazê ke Kurdistan û Tirkîya ra şîyî Hatay şarî reyde kewtî mîyanê hewldayîşan. Taxa Çekmece ya Defneye ya Hatayî de zerrîwazî konî ronayî û kesê mexduranê erdlerzî rê her hetî ra benê hetkar. 

 

Eke zerrîwazî nêbayêne ma do bi cemedîyayêne

 

Esmehan Bostanciya ke taxa Çekmece de ronişena û keyeyê aye xisarêk gird dî, kişta keyeyê xo de konê xo ronaya. Esmehana ke keye û merdimanê xo ra xeylê kesan vînî kerda her serê sibayî qehwe virazena û bena konê zerrîwazan. Esmehane da zanayîş ke wexto ke erdlerz qewimîyayo ra nata tewrê 15 kesan konêk de manenê û wina vat: "Roja yewine de xêrcê zerrîwazan tu kesêk nêame. Zerrîwazan ra nêbayêne ma do bi cemedîyayêne."

 

'Paştîdayîşêk weş mojnenê'

 

Esmehane ard ziwan ke dima ra merdimê înan yê Edene înan rê konteynirêk şirawit û wina dewam kerd: "Dewlete hetkarî nêda ma. Merdimê ke ma nêşinasnayêne hetkarîya ma kerd. Keya nêame kişta ma. Cinîyê zerrîwazî yê ke ma nêşinasnenê paştîdayîşêk weş mojnayî. Ez bajarê xo nêteriknena. Beno ke ez seba demêk şêra meymandarî la nêeşkena bimana. Ez do agêra. Ez hem tutanê xo hem zî torunanê xo û hem zî cuya tîya nêteriknena. Ma nika bi paştîdayîşê zerrîwazan cuyenê. Hukmat ma ra helalî waşt. La ez helal nêkena. Selahîyetdarî qesr de cuyenê û ma zî konan de."

 

'HDP cuya ma xelisna'

 

Esmehane qiseykerdişê xo wina qedêna: "Mi verê cû HDPyî nêşinasnayêne. La nika mi zêde şinasna. Ez raya xo dana HDPyî. Kam se vano wa bivajo. Cuya şarê Çekmece û dewijan xelisna. Ez zit zerre ra vejîyaya, tu çîyêk ma ser de çinî bî."