Gulîstan Şahîn

 

QAMIŞLO - Endamê Kongreya Starî bi munasebetê 8ê Adare dîyar kerdî ke 8ê Adare mîrasê yewbînangirewtişê heme cinîyanê dinyaye ya û mesajê xo yê derheqê na roje de wina vatî: “Cinî na roje de bîyayîşê xo vînena û wazena her roje bikera 8ê Adare.”

 

8ê Adare Roja Cinîyanê Dinyaye bi xeylê aktîvîteyanê renginan yena pêşwazîkerdiş. La emserr erdlerzê Vakurê Kurdistan û Sûrîye vera sey pîrozkerdişan nê hîna zêde sey çalaki û aktîvîteyan bi rihê paştîdayîşî yena pêşwazîkerdiş. Cinîyî her hetê Kurdistanî de startê xo yê 8ê Adare dayî, deklerasyonanê xo eşkera kerdî û bi rihê xoverdayîş û têkoşînî emserr pêşwazî kenê. Derheqê 8ê Adare de Endamê Kongreya Starî mesajê xo pare kerdî.

 

'Seba 8ê Adare rayraşîyayîşê girseyî yenê viraştiş’

 

Endama Komîteya Raşteyê Komelkî ya Kongreya Starî Mizgîn Hemoye derheqê 8ê Adare de ercnayîşanê xo wina kerd: “Ma roja pêroyê cinîyanê azadîwaştoxan pîroz kenê. Cinîyî her serre na roje bi kinc û berganê xo yê neteweyîyan pêşwazî kenê. La emserr rewşa erdlerzî vera cîya yena pêşwazîkerdiş û herinda pîrozkerdişan de ma do rayîr ra şîyayîşê girseyî pê bîyarê. Sewbîna xeylê kombîyayîş, semîner, platform û sempozyumî ameyî viraştiş. Erdlerzî vera bi hezaran merdimi dinyaya xo bedilnayî û no bî birînêke ke mîyanê şarê kurdî de ame ciwîyayîş. Seba piştişê nê birînî ma mîyanê şarî de hewldayîşan mîyan de yê. Seke yeno zanayîş erdlerz merdiman nêkişt, polîtîkayê dewlete hende mergan rê rayîr akerd. Vengdayîşê ma pêroyê cinîyan ra no yo ke bi fikir û felsefeya Rayber Apoyî hemverê sîyasetê camêrdî de têkoşîn bikerê. Hêzê cinîyan ameyoxê şaran dîyar keno.”

 

'Yewbîyayîş û yewbînangirewtişê cinîyan têkoşînê cinîyan muhakkak keno’

 

Endama Koordînasyonê Kongreya Starî ya bajarê Qamişlo Îbtîsam Elî Hisêne derheqê 8ê Adare de wina vat: “8ê Adara mîmarê rêxistina azadîya cinîyan ya Rayber Apo û pêroyê cinîyan pîroz kena. 8ê Adare mîrasê cinîyanê têkoşeran a. Netîceyê zîhnîyetê cînsîyetperestî de se ra zêdêr cinîyî fabrîkaye de ameyî veşênayîş. Ewro zî eynî zîhnîyet vejîyeno raşte. Zîhnîyetê camêrdî bi şorişê Rojawanê Kurdistanî reyde ameye mehkumkerdiş. Cinîyî ewro bi vîr û bawerîya xo, xo rêxistin kenê û pêroyê cinîyanê dinyaye rê benê îlham. Roj bi roje fistanê koletîye yeno dirnayîş û cinî xo rêzilê koletîye ra xelisnenî. Ewro bi serkêşîya cinîyanê kurdan sloganê ‘Jin Jiyan Azadî’ her hetê dinya de yeno berzkerdiş. No zî netîceyê têkoşîn û xoverdayîşê cinîyan de bî. Nê serranê peyênan de merheleya dinyaye de xeylê konferansê cinîyan dinya de pê ameyî û na rewşe yewbîyayîş û yewbînangirewtişê cinîyan ya seba konfederalîzmê cinîyan vetî raşte. Vengdayîşê ma pêroyê cinîyan rê no yo ke wa cinîyî heme raşteyan de hemverê zîhnîyetê camêrdî de têkoşîn bikerê.”

 

'Yewbînangirewtiş û tîfaqê xo awan bikerê’

 

Endama Têkilî û Tîfaqê Demokratîke ya Kongreya Starî Ruken Ehmede zî têkoşînê 8ê Adare yê pêroyê cinîyan pîroz kerd û vat: “Roja 8ê Adare seba cinîyan rojêka muhîm a û bi mana ya. Cinî na roje de manaya bîyayîşê xo vînena û wazena her roje bikera 8ê Adare. Xeylê cinîyî seba na roje têkoşîn danê û dewa rayra benê û ma ewro bi saya înan bi hawayêkê azad na roje pêşwazî û pîroz kenê. Cinîyî seba waştişê heq û seyyewbînanîye ameyî veşênayîş. A roje ra heta na roje têkoşînê cinîyan bi hawayêk cîya dewam keno ke ewro bi sloganê ‘Jin Jiyan Azadî’ şar û cinîyî her ca de hemverê zîhnîyetê îqtîdarî de têkoşîn danê. Mîmarê sloganê 'Jin jiyan azadî' Rayber Apo yo û hetê cinîyan ra yeno ciwîyayîş. No slogan Vakur û Rojhelatê Sûrîye de ame newekerdiş û Rojhelatê Kurdistanî bî dinyayî. Ma do binê veristîya nê sloganî de cuyêka azad awan bikerê. Lazim o ke ma cinîyî yewbînangirewtiş û tîfaqê xo her raşteyê dinyaye de awan bikerê. Sey cinîyê Vakur û Rojhelatê Sûrîye ma paştîdayîşê heme şorişê cinîyan kenê û ma do her roje bikerê roja têkoşînê cinîyan."