WAN - Hemsereka HDPyî ya Wanî Handan Karakoyune dîyar kerd ke erdlerzî vera bi sloganê 'Yewbînan giretişê cinîyan cuye ya’ xebata xo ya 8ê Adare domnenê û vat: “Bobelato ke qewimîya qeder nîyo û vera nê zîhnîyetî de ganî ma bibî yew û têkoşînê xo gird bikerê.”

 

Tevgerê Cinîyanê Azadan (TJA) 25ê sibate de bi sloganê 'Yewbînan giretişê cinîyan cuye ya’ û Meclîsê Cinîyan yê Partîya Demokratîke ya Şaran (HDP) 26ê sibate de bi siloganê ‘Ma bi tena nîyê, ma pîya yê, Jin Jiyan Azadî’ startê 8ê Adare dayî û bernameyê xo eşkera kerdî. Erdlerzo ke qewimîya ra 11 bajarî tesir bîyî û coka ra şahî û mîtîngê 8ê Adare ameyî betalkerdiş û herinda ci de xebata paştîdayîş û hetkarîye dîyayî destpêkerdiş.

 

28ê sibate de Wan û Agirî de TIRê hetkarîye ke mîyanê înan de lazimîyê cinî û tutan estbî ver bi Meletî kewtî rayîr. Derheqê mexdurîyetê cinîyan de hetkarîya ke seba cinîyan yena arêdayîş de Hemsereka HDPyî ya Wanî Handan Karakoyune ajansê ma rê qisey kerd.

 

‘Me şahî û mîtîngê xo betal kerd'

 

Handane da zanayîş ke sey her serre emsar zî bi coşêk pîl hemverê îqtîdarê camêrd amadekarî pêşwazîkerdişê 8ê Adare kerdêne û vat: "La çi heyf emsar 11 bajaran bi erdlerzî bi tesîr bîyî. Felaketêk pîl ame cuyayîş. Seba nê sebebî ma şahî, mîtîngê xo betal kerd. Ma qerar de ke ma do 8ê Adare emsar bi cinîyanê mexdûrê erdlerzî reyde dewam bikerê. Ma do pîya bîrînanê yewbînan bipêşnê. Seba nê sebebî ma vanê, 'Pêgirewtişê cinî cuye ya."

 

'Ma bi mexdûrê erdlerzî reyde bê'

 

Handane, roja ewilî heta ewro HDP herêmê erdlerzî de bi şarî reyde bi û wina vat: "Hemverê her tewir astengîya dewlete, mîyanê şert û mercê zehmetî de xo resnayî herêmanê erdlerzî. Bi paştdayîşê şarî ma kewtî rayîr. Do rojê bêrê de zî bi mexdûran reyde bê û xebatanê xo dewam bikerê."

 

'8ê Adare de do rayîr ra şîyayîş bêro organîzekerdiş'

 

Handane qiseykerdişê xo wina dewam kerd: "Seba pîlkerdişê paştdayîş û hetkarî ma xebatanê xo hîra kerd. Çarçewaya 8ê Adare de ma TIRanê hetkarîye herêmanê erdlerzî rê erşawit. Mîyanê hetkarîyan de lazimîyê cinîyan estbî. Ma Wan ra hetkarî erşawit Meletî. Ma serdayîşê mexdûrê erdlerzî ke Wan de bi ca bîyê kerd. Sewbîna ma do 8ê Adare de zî merkezê Wanî de rayîrşîyayîşêk organîze bikerê."

 

'Ma do pîya têkoşînê xo girs bikerê'

 

Handane dîyar kerd bê cîyayîyê ziwan, netew, bawerî û siyasî hetkarîya mexdûrê erdlerzî kenê û wina vat: "Mabêne şarê ke Kurdistan û Tirkîya de cuyenê de cîyayê pîlî estê. Nê cîyayî de tewr zêde cinî mexdûr benê. Ganî pêro cinî bêcîyayî pîya bê. Şert û mercê ke ma mîyan de yê qedere nîya û ma venga cinîyan kenê ke ganî ma pîya vengê xo berz bikerê û têkoşînê xo girs bikerê."