COLEMÊRG - Cinîyan dîyar kerd ke tewr zêde cinî û tutî erdlerz ra tesîr bîyê, vatî ke ê do bi ruhê 8ê Adare  paştdayîşê xo gird bikerê û pêro raşteyan de kîşte mexdûranê erdlerzî de bê.

 

Dimayê erdlerzê merkezê ci Mereş de pê ame, Partîya Demokratîke ya Şaran (HDP) û aktîvîstê Tevgerê Cinîyan ê Azadan (TJA) roja ewilî yê erdlerzî de pêwa kesê ke seba erdlerzê mexdûr bî ca girewtî û paştdayîşê xo dewam kenê. Na serre çarçewaya 8ê Adare Roja Cinîyan ê Dinya de, cinîyê mexdûrê erdlerzî rê qolîyê hetkarîye ameyî şirawitiş. Nê merkezê ke paştdayîşê xo bi merkezê erdlerzî rê neql kerdî yew zî Colemêrg û merkezê ci bî.

 

Cinîyê ke roja ewilî yê erdlerzî rê paştdayîşê xo yê bi mexdûrê erdlerzî rê dewam kenê, ardî ziwan ke tewr zêde cinî û tutî erdlerz ra tesîr bîyê û do paştdayîş û pêgirewtişê xo bi cinîyê ke seba erdlerzî mexdûr bîyê rê dewam bikerê.

 

'Ma do bi 8ê Adare reyde paştdayîşê xo girs bikerê'

 

Hemsereka HDPyî ya Colemêrgî Humeyra Armut dîyar kerd ke ê do 8ê Adare de bi cinîyanê mexdûrê erdlerzî rê mîyanê paştdayîş û pêgirewtişî de bê. Hûmeyra wina vat: "Rijnayîşê ewro û dima do tewr zêde tesîrê xo cinîyan rê bikerê. Ma prosesêko zehmet ra derbaz benê. Bi betalkerdişê pêro pîrozbayîyê 8ê Adare yê emsar ke do biameyîne betalkerdişî, ma waşt ke ma cinîyê mexûdûrê erdlerzî reyde paştdayîş bidê û tora xo ya hetkarî û pêgirewtişî hîra bikerê. Colemêrg de seba lazimîyê bingehîn ê cinîyan ma  kampanyayêk ma da destpêkerdiş. Komêk embazê cinî bi viraştişê pakêtê bi malzemeyê ameyê reyde dima ra nê paketan berdî raşteyê erdlerzî û cinîyan ra vatî ke ê nê prsesî de tena nîyê. Ma do her wext cinîyan reyde mîyanê paştdayîş de bê."

 

'Pêgirewtişê cinîyan 8ê Adare de girs bîyo'

 

Humeyra tewr peyîn wina vat: "Na  kampanyaya ke ma bi wesîleyê 8ê Adare da destpêkerdiş do demêk derg dewam bikera. Hem raşteyê erdlerzî û hem zî bajarê ke ma ci de ma do paştdayîş dewam bikerê. 8ê Adare seba ma cinîyan rojêke muhîm a, seba ma roja têkoşînî ya.  Pêgirewtişê ma yê bi ruhê 8ê Adare dewam bikero."

 

'Ma do roj bi roje pêgirrewtişê xo girs bikerê'

 

Hemserekê DBPyî yê Colemêrgî Sîpan Turan zî dîyar kerd ke înan heta 8ê Adare tora xo ya hempar ê bi erdlerzeyan reyde hîra kerdê û ê do pêro cinîyan reyde mîyanê paştdayîşî de bê. Sîpanî vat, “Demo ma 8ê Adare de kewtî rayîr, ma bi ruhê pêgirewtişê cinîyan paketê lazimî dayî cinîyanê herêman ê erdlerzî. No pêgirewtiş do bi 8ê Adare reyde sînordar nêbo, ma do cinîyan reyde roj bi roje pêgirewtişê xo pîl bikerê. Heta destê ma ra bêro ma do cinîyan reyde mîyanê paştdayîşî de bê."