SEMSÛR – Xebatkara komelo sivîl Nahoko Takato ya Japone ke Başûrê Kurdistanî ra ameye Narlikuyu, konbajar de seba tutan workshop kena û dîyar kerd ke ganî paştîdayîş gird bibo.

 

Bilançoya di erdlerzê ke 6ê Sibate de qewimîyayî û merkezê înan Mereş bî û sewbîna erdlerzo ke 20ê Sibate de Hatay de qewimîya, her ke şina giran bena. Erdlerzan de bi deshezaran kesî dinyaya xo bedilnayî û bi hezaran awanîyî rijîyayî. Nê erdlerzî 11 bajaran de texrîbatê girdî viraştî û nê bajaran ra yew zî Semsûr o. Erdlerzî ra dima dewlete ra ver zerrîwaştoxî xo resnayî hewarîya hemwelatîyan. Bajar de bi awankerdişê konbajaran cuye dewam kena. Nê konbajaran ra yew zî Partîya Demokratîke ya Şaran (HDP), Tevgerê Cinîyan ê Azadan (TJA) û rêxistinê komelo sivîlî pîya qezaya Narlukuyu ya Semsûrî de awan kerd.

 

Xeylê zerrîwaştoxî konbajarî de seba paştîdayîşî xebetîyenê. Înan ra yew zî Nahoko Takatoye ya Japona ke 20 serrî ya raşteyê komelo sivîl de xebetîyena. Nahokoye Başûrê Kurdistanî ra ameya Semsûrî û seba tutan bername û workshop kena.

 

Seba hetkarîye ameya

 

Nahokoye derheqê ameyîşê xo û amacê ameyîşê xo de qisey kerd. Nahokoya ke Duhok de cuyena bi Wezîrîya Parwerdeyî ya Başûrê Kurdistanî reyde ameya herême û tîya de seba tutan atolyeyan pê ana. Nahokoye qiseykerdişê xo de wina vat: “Ma xebera erdlerzî girewt. Japonya zî cayê erdlerzî de yo. Ez kewta mîyanê hewldayîşan. Ez çarçewaya projeyo ke xebetîyena de ameya tîya. Rewşêka winasî de tutî û cinî bene mexdur. Ez seba hetkarî ameya tîya.” 

 

Hetkarîya psîkolojîkî muhîm a 

 

Nahokoye ard ziwan ke yewine rey aye ameya Semsûr û konbajar de nizdîyê 80 tutî estê û wina dewam kerd: “Amacê mi no yo ke ez tutan kêfweş bikera. Nika kesê pîlî hema tesîrê erdlerzî xo ser ra nêeştî. Travmayanê winasîyan ra dima hetkarîya psîkolojîk zaf muhîm a. Ganî xebatkarê komelo sivîlî tewrê projeyî bibê. Ganî şarê tîya reyde xebatê tewir bi tewirî bêrî rayraberdiş.”

 

Nahokoye vengê paştîdayîşî kerd û qiseykerdişê xo wina qedêna: “Tutan goreyê pîlan hîna zêdêr rewşe ra tesir benê û tersenê. Coka ra zî ganî ma înan goşdarî bikerê, înan reyde qisey bikerê. No xeylê muhîm o. Ez do paştîdayîşê xo yê bi erdlerzan reyde dewam bikera.”