Dîlan Babat - Gulistan Dursun

 

DÎLOK - Taxa Şakçagozu ke hezar û 500 nifûsê ci esta girêdayeyê Cebelînûrî ya Dîlokî ya û tena xirbeyî mendê. Taxe de 638 kesî dinyaya xo bedelnayî.

 

Welatîyê taxe dîyar kerdî ke di rojan şar terkê qedera xo ameyo kerdiş.

 

Serê erdlerzo ke merkezê ci Mereş bi de 27 rojî derbaz bî. Roja ewilî ra paştdayîşê şarî dewam keno.  Sakçagozu yê girêdayeyê Cebelînûrê Dîlokî zî tablo cîya nîya. Taxa ke hezar û 500 nifûsê ci estbî 638 kesî dinyaya xo bedelnayî.

 

Hîrê rojî dimayê erdlerzî konî ameyî ronayîş 

 

Gulîstan Ozdînçe ya taxa Sakçagozî de ameya dinya dîyar kerd ke bi erdlerzî reyde dêsê keyeyê aye rijyayê dimayê vejîyayîşê teberî pêro keye rijyayo û wina vat: “Ma kewtî embarê cîranan. Em 20-30 kesî embar de mendî. Her kesî bi îmkanê xo merdimanê xo vet. Heta hîrê rojan tu kes çinbi. Şar bi îmkananê xo însanan xirbeyan ra vetî. Şarî xo resna hetkarîya ma. Tîya dimayê hîrê rojan konî ameyî ronayîş.”

 

Gulîstane da zanayîş ke cinîyê ke pitikê înan înan ver şîyê û wina vat: “Êlih ra ma rê hetkarî ameye. Cinîyan nanê ke pewtibî şirawitî. Pêwa ke çend rojî derbaz bîyo, ma nika problemê hîjyenî ciwîyenê. Cinîyê ke pitikê înan înan ver şî estê. Lazimîya ma bi tuwaletan esta.”

 

‘Keda min a bi serran sanîyêke de şî’

 

Leyla Ozdîke zî wina vat: “Ma wuştibî sihor. Erdlerz pê ame. Ma rojêke vêşan mendî. Roja bîn şar ame hetkarî. Çar tutê mi estê. Mêrdeyê mi çin o. Min û tutanê xo bi xebate no keye viraşt. Bi kedêke pîle ma viraşt. La sanîyeyêke de rijya û şi. Nika ma konêk de çar panc keyeyî pîya manenê. Cîranê mi rojêke binê xirbeyan de mend. Dima ra ekîbî ameyî. Pêro merdî. Tuto 16 serre, pîyê ci merd. Ma merg ra xelisyayî. Cenazeyî werte de mendî. Kes çinbi wedarno. Ma zî merdeyê ma zî bêwayîr mendî.”