Elfazî Toral - Rahîme Tekîn 

 

WAN - Cinîyê Wanî binê şertanê giranan de xebetîyenê û eynî wextî de bi xebata xo ya hemverê serdestî de zî têkoşîn danê û dîyar kerdî ke bi paştîdayîşî eşkenê zîhnîyetê serdestî bibedelnê.

 

Emserr 8ê Adare Roja Cinîyanê Dinya Kurdistan û Tirkîya de bi dejê deshezaran kesê ke erdlerzî de dinyaya xo bedilnayî yena pêşwazîkerdiş. Erdlerzî vera cinîyî paştîdayîşê xo gird kenê û vera binpaykerdişê keda cinîye de zî têkoşîn danê.

 

Wan de cinîyê ke xebetîyenê û keda înan yena binpaykerdiş, vera her çîyî têkoşîn danê. Cinîyan çîyê ke cuyenî ajansê ma rê vatî.

 

‘Mi qet heqê keda xo nêgirewt’

 

Neclaya ke AVM de xebatkara pakîye ya vat ke seba xo û kênaya xo ya 14 serrî têkoşînêk gird dana û vat: “Bi xeylê zehmetîyan reyde tîmî yena rî bi rî. Nika AVMyî de xebetîyena. Pêro cuya mi bi xebate derbaz bî. La qet mi heqê keda xo nêgirewte. Ez 8 saetan tîya de xebetîyena. Hewte de reyêk destur gêna. Mîyanê roje de nîm saete heqê boydayîşî esto. La şertê ma zaf zehmetin ê.” 

 

‘Ma cinîyî zaf xurt ê’

 

Neclaye wina dewam kerd: “Zaf reyan mobîng yeno kerdiş. Coka ra mi xeylê karan bedilna. La qet mi fek têkoşînê xo ra vera nêda. Ganî cinîyî bi xo bawer bibî. Ganî ma cinîyî pîya mîyanê patîdayîşî de bî. Ganî cinîyî şerm nêkerê. Ez dayîkêk a. Kênaya mi 14 serrî ya. Ez sey cinîyêke hêz dana kênaya xo. Ganî qet sere nêronî. Cinîyî xeylê xurt ê”

 

‘Îdareyê keyeyî kena’

 

Cinîya bi nameye Bîrgula ke AVMyî de pakî kena, aye zî nînan ard ziwan: “Şertê karî zehmetin ê. Seba ke karêk bîn çin o ez tîya de xebetîyena. Ez hewl dana ke hetê ekonomîye de payanê xo ser de vindera. La heqê keda xo nêgêna. Heta nîmeyê şewe tîya de xebetîyena û xeylê reyan wesayît çin o ke ez şêra keye. Seba mi qet wext nêmaneno. Ez hewl dana ke tutanê xo û mêrdeyê xo kêfweş bikera. La reyna zî mird nêkeno. Ez îdareyê keyeyê xo kena.”

 

‘Cinîyî zaf yene binpaykerdiş’

 

Cinîya bi nameyê Hulyaye ke yew serrî lokantayêk de xebetîyena bale ant zor û zehmetîyan ser û wina dewam kerd: “Seba ke ez xebetîyena kêfweş a. Ganî her cinîyêk bixebeta. Ez kedêka gird dana. Sey dayîkêke hem xebetîyena hem zî keye de ewnîyena tutanê xo ra. No zaf zehmetin o. Qet şik çin o ke tedaya keyeyî zî sere mi de esto. Nê cayan de cinîyî zaf yenê binpaykerdiş. Ez keyeyan zî eşkena nimune bimojna. Hetêk de zî mecburî xebetîyena. Komel tay rolan bi cinîyan ferz keno. Hewl danî ke cinîyan bikerê rolê makulî. Cinîyan hepsê keyeyî kenê û vanê ke biewnê tutan ra. Cinî tena na nîya. Ez nê zîhnîyetî qebul nêkena. Ganî cinîyî girêdayeyê kesî nêbê. Ganî cinîyî bixebetê, payanê xo ser de vinderê.”

 

‘Mi xo bîyaye kerd’

 

Cinîya bi nameyê Gurbete zî ard ziwan ke hema 13 serrî ya xo de erdan de dest bi xebate kerda û dima ra manavêk de dest bi karî kerda û vat: “Ez hêzê xo ra bawer a. Ez 30 serrî ya. Emrê mi bi xebete derbaz bîyo. Ez xebate ra zaf hes kena. Ez ekonomîya xo bi xo dest fînena.  No ra weşêr çi esto gelo? Ganî mîyanê çar dêsan ra bivejî. Zîhnîyeto serdest beno sebebê qetilkerdişê cinîyan. La paştîdayîş û têkoşînê cinîyan eşkeno sîstem bibedilno.”

 

Roje de 12-13 saetan xebetîyena

 

Berîvane zî cinîyê ke şertê giranî yê tekstîlî de xebetîyenî ra yew a. Berîvana ke 6 aşmî yo teksîtîlî de xebetîyena wina qisey kerd: “Ma 18 tenî tîya de xebetîyenê. 11 cinî û 7 camêrdî estê. Ma sere sibayî saet 08.30î de yenê û heta saet 9an xebetîyenê. Ma binê heqê asgarî de xebetîyenê. Ez heqê keda xo nêgêna la mecbura bixebeta. Çi heyfo ke qet mi heqê keda xo nêgirewta. Sey hêzê ercan yê karî ma yenê şixulnayîş. La cinî eşkenê her çîyî bikerê, cinîyî xurt ê, ganî xora bawer bibê.”