MERKEZÊ XEBERAN - Yewîya Cinîyanê Elewîyan ê Demokratîke, bi wesîleya 8ê Adare mesajêkê weşêna û vat: "Ma do her ca de yewîye û pêgirewtişê xo xurt bikerê û azadîya xo bidest bikerê."

 

Bi wesîleya 8ê Adare Yewîya Cinîyanê Elewîyan ê Demokratîke mesajêkê weşêna.

 

Mesaj de wina ame vatiş:

 

"Ma bi destkewtişê têkoşînê cinîyan ê seserra 21ine de xo bi rêxistin kenê û ver bi azadîye şinê.

 

Çi heyf, ma bi dejêk pîl kewenê 8ê Adara 2023ine  Roja cinîyanê Kedkaran ê Dinya. Xeylêk bajarê Kurdistanî, Rojawan, Sûrîye û Tirkîya seba erdlerzî wêran bî. Dimayê erdlerzî dewleta camêrserwer nêeşka wezîfeyê xo bica bîyara û rayîr ver trajedîyê pîlî yê komelî, tarîxî, sinife, nasneme û xoza akerd.

 

Bi taybetî faşîzmê Erdogan-Bahçelî yê Tirkîya, peyserîyê Talîban ê Afganîstanî û sîstemê serdest ê camêrdan xeylêk welatê Rojhelatê Mîyanên, Ewropa û Amerîkayî bi polîtîkayê sîyasî, komelî, ekonomîk, medyayê hêrişê xo yê serê cinîyan zêde kerdê.

 

Ma Yewîya Cinîyanê Elewîyan ê Demokratîke hemverê nê mêrdeyî û zîhnîyetê kolonyalî xo ver danê û ma do têkoşînê xo geş bikerê. Ma do her ca de yewîye û pêgirewtişê xo tewr xurt bikerê û azadîya xo bi dest bikerê."