Melîke Aydin

 

HATAY - Endama Meclîsê Cinîyan ya HDPyî ya Bursaye Fîgen Ovata ke merkezê koordînasyonê krîzî yê qezaya Defneyî de ca gêna dîyar kerd ke probleme cinîyan yê konan qat bi qat dewam kenê û vengê pêvînayîşê cinîyan kerd.

 

Erdlerzê 6ê Sibate ke girdîya ci 7.7 û 7.6 bî û merkezê ci qezaya Bazarcixî ya Mereşî bî 11 bajaran wêran kerd û goreyê dayeyanê fermîyan bi des hezaran kesî dinyaya xo bedilnayî, bi des hezaran kesî zî birîndar bîyî. Herêma erdlerzî de wexto ke xebata wedaritişê xirban dewam kerdêne Hatay de erdlerzêk bîn qewimîya. Hatay zî bi girdi 6.4î lerza û awanîyê ke bajar de mendî wêran kerd. Partîyê sîyasî, rêxistinê sivîl û sendîkayî roja ewile ra nata herême de yî û seba hemwelatîyanê ke keyeyê înan erdlerzî de rijîyayî kampanyaya xo ya hetkarîye dewam kenê. Sey sebebanê şer û krîzê ekonomî, erdlerzî ra zî tewr zêde cinî û domanî tesrî benê.

 

Partîya Demokratîke ya Şaran (HDP), Konfederasyonê Sendîkaya Kedkaranê Rayapêroyî (KESK) zî tede merkezê koordînasyono ke qezaya Defne ya Hatayî de ameybî awankerdiş seba cinîyan kon akerd. No raşteyê kolektif ke bi keda cinîyan ameya awankerdiş, vêşêrê temînkerdişê malzemeyanê pakîye yê seba cinîyan, cinîyan reyde sohbet zî yeno kerdiş.

 

Nê zerrîwazan ra yew zî endama Meclîsê Cinîyan ya HDPyî ya Bursaye Fîgen Ovate ya. Fîgene derheqê babate de ajansê ma rê qisey kerd û dîyar kerd ke raşteyê konan de probleme cinîyan qat bi qat zêde bîyî û şîdetê mîyanê keyeyî konan de zêde bîyo.

‘Seba cinîyan raşteyêk xoser ame awankerdiş’

 

Fîgene da zanayîş ke merkezê Antakyaye de rijîyayîşêk gird pê ameyo û vat ke erdlerzî ra dima barê cinîyan giran bîyo. Fîgene dîyar kerd ke cinîyî çinîbîyayîşê awe û çinîbîyayîşê pakîye vera bi nêweşîyê sey xurîyayîş, gerbîyayîş û sewbîna nêweşîyan kewenê û dîyar kerd ke cinîyî awa lêşin vera her roje mecbur manenê ke kincanê xo bibedilnî. Fîgene vat: “Ma tena malzemeyanê pakîye dane konanê cinîyan, ma cinîyan reyde sohbet kenê û cinî eleqeyêk gird mojnenê ma. Bi awankerdişê raşteyê xoserî, ma înan rê ca viraşt. Bi no hawa ma eşkenê bi asanî qala problemanê ke cuyenî bikerê.” 

 

'Şîdetê mîyanê keyeyî derbazê konan bîyo’

 

Fîgene ard ziwan ke barê cinîyan yê sey cigêrayîşê tutan, cigêrayîşê keye û cigêrayîşê astengdaran cuya konan de di qat zêde bîya û vat ke şîdetê mîyanê keyeyî derbazê konan bîyo. Fîgene bale ant muhîmîya paştîdayîşê bi cinîyanê astengdar û tutan ser û wina vat: “Ma raşteyo ke do cinîyî hîna bi hêz bibê û bieşkê asanî problemanê xo vajê awan kenê. Ma paştîdayîşê manewî kenê. Ma seba paştîdayîşê psîkolojîk zî hetkarîye danê. Ma bi taybetî çarçeweya tesîrê erdlerzî de moral danê û cinîyan şirawenê hetê psîkologanê pisporan.”

 

'Do TIRê Morî bêrê' 

 

Fîgene qiseykerdişê xo yê peyênan de dîyar kerd ke hetê lazimîyê cinîyan yê sey pîjama û binkincî ke seba weşîya cinîyan zaf muhîm ê de problemî yenê cuyayîş û vat: “Vera hetkarîya cinîyan ma tewr tay roje de cinîyan ziyaret kenê. Cayo ke awa pakete de çinî bo de tewr zêde cinîyî zehmetî ancenê û nêweşî bi înan de peyda bena. La hemkarîya cinîyan bi cinîyan reyde dewam kena. Hewteyo vernîya ma de zî TIRê Morî do bêrî û xebata ma do zêde biba. Wa her kes baş bizano ke ma tîya de lîsteya lazimîyanê cinîyan ya acîl virazenê.”