Dîlan Babat

 

DÎLOK - Gonul Tunçbileka ke Taxa Çakmak ya Cembelînurî de binê xirban ra ameye vetiş, da zanayîş ke aye bi 5 cinîyan reyde binê xirbî ra xida vetî û şorba viraştî û şarî bi no hawa hewayo serdin ra pawitî. Gonule dîyar kerd ke hetkarîye her cayê dûrî yê Şirnexî ra ameye û vat: "Ma şaş mendî. Ma bawer nêkerdêne la ma xeylê hîssin bîyî."

 

6ê Sibate de merkezê ci qezaya Bazarcixî ya Mereşî de girdîya ci 7.7 û 7.6î de di erdlerzî qewimîya. Erdlerzî ra dima Taxa Çakmak ya Cembelînurî de tena hîre awanîyî pay ser de mendî. Hetkarîyê ke seba şarî ameyî zî badê çar rojan resnayî verê destê şarî. Hemwelatîyî rojanê ewilînan de bi paştîdayîş û  hêzê xo hewl da ke birînanê xo bipişno. Erdlerzî ra dima şar verê keyeyê şînî de arê bîyî û keyeyê ke temamî nêrijîyayî ra xida ardî û şorba viraştî. Bi no hawa hewl dayî ke xo hewayo serdin ra bipawê. Sewbîna hemwelatîyî dîyar kerdî ke hetkarîya ewile Şirnexî ra ameye.

 

Hetê mêrde û tutanê xo ra ameye xelisnayîş

 

Gonul Tunçbileka ke erdlerzê serê sibayî de binê xirbî de mende wina vat: "Vejîyayîşê mi yê binê xirban ra mucîze bî. O wext tena ez tutanê xo fikirîyaya. Xelisnayîşê înan fikirîyaya. Bado ke tutê vejîyayî mêrdeyê mi vat ti zî biveje, mi zî vat ez nêeşkena biveja dolab mi ser de yo. Mêrde û tutanê mi dolab mi ser ra wedarnayî. Ez bi no hawa vejîyaya. Bado ke ma vejîyayî keyeyê ma sey kerrayê domîno rijîya. O wext dayîka mi ameye mi vîr. Tam ez şîyêne keyeyê dayîka xo keyeyê xala mi verê mi de rijîya. Dayîka mi zerre de mendbî û berê keyeyî padîyabî û ber ameyî kilîtkerdiş. Ma kerrayê ke kewtbî vernîya berî wedarnayî û ma wina dayîka mi xelisna."

 

'Hemwelatîyê dewê nizdî ameyî hewarîya ma'

 

Gonule da zanayîş ke erdlerzokî timî dewam kerdêne coka ra ê derbazê kişta keyeyê şînî bîyî û vat: "Vewr û varan nêvindertêne. Seba ke ma bi lezkî keye ra vejîyayî û keyeyê ma rijîya serê ma de zî çîyêko baş çinî bî ke hewayo serdin ra bipawo. Serê banê keyeyê şînî de naylon estbî. Mi naylon lefna dormeyê tutanê xo. Tewr peynî ma yew keyeyo ke nêrijîyabî ra betanîyî vetî. Hemwelatîyê dewanê nizdîya ma ke erdlerz dewa înan de zêde xisar nêviraştbî ameyî hewarîya ma. A roje wext zêde derg bîbî. Nêbîyêne siba. Seba ke ez binê dolabî de menda sereyê mi şikîyabî û tew mi gonîye ferq zî nêkerd. Seba ke hewa serdin bî gonîya sereyê mi vindert."

 

'Hetkarîya ke Şirnexî ra ameye ma xeylê hîssin kerde'

 

Gonule ard ziwan ke tewrê 5 cinîyan mîyanê xirban ra xida gêrayî û wina dewam kerd: "Dima ra mi dî ke mutfaxê keyeyê mi xerepîyayo. Ez şîya hema çi kewt destê mi, mi girewt ard. Bi paştîdayîşî ma roja ewile hewl da ke birînanê xo bipişnî. Ma uca de fehm kerd ke yewîye çîyêko zaf weş o. Wexto ke zimistan bîyêne kuçeya ma de 50 kesî cuyayêne. La nika ma kişta keyeyê şînî de werd danê 300 tenan. Hetkarîya yewine cayo ke ma qet texmîn nêkerdêne ra ameye. Hetkarîya ke Şirnexî ra ameye ma xeylê hîssin kerde. Taxa ma de kurd, elewî, çerkezî estbî. Ma cayanê bînan ra hetkarî pawitêne. Cayêk dûrî yê sey Şirnexî ra ameye, coka ra ma şaş mendî. Hetkarîyêka zêde bî zî."

 

Cînîyî keyeyêk zexm ke pay ser de mendo de awe germ kenê û pê sereyê xo şuyenê

 

Gonule qiseykerdişê xo yê peyênan de da zanayîş ke aye do fek herra xo ra vera nêda û wina vat: "Konan de seba ke ma pêro pîya yê na rewşe psîkolojilîyê tutan zî xerepnena. Ma do paweyê konteyniran vinderê. Tena awanîyêk pay ser de menda, ma uca de hewl danî sereyê xo bişuyî. Duşê seyyar ardî la hema nêameyo ronayîş. Xebata xelisnayîşî nêame kerdiş. Hemwelatîyî yewbînan xelisnayî. No yew hewteyo ke dest bi wedarnayîşê xirban kerdî."