HATAY - Zuleyha Guluma HDPyî dîyar kerd ke ê do zor bidî dewlete ke bacê ke arê daya seba şarî xerc bikera û vat ke seba awankerdişê Hatayî do bi dînamîkanê herême reyde têbigêrê û vera koçberîye de zî projeye konbajarî esas bigîrê.

 

Erdlerzo ke merkezê ci Mereş bî ra dima xebeta wedarnayîşê xirban û vetişê cenazeyan dewam kena. Parlementera Partîya Demokratîke ya Şaran (HDP) Zuleyha Gulume derheqê prosesî de qisey kerd û dîyar kerd ke xebata paştîdayîşî ya partîye û kampanyaya înan dewam kena. Zuleyhaye vat ke îqtîdar koçberîye bi şarî dano ferzkerdiş û vera nê ferzkerdişan de ê têgêrayîşêk hempar yê bi dînamîkanê herême reyde esas gênê.

 

Raştîya erdlerzî newe yena ferqkerdiş

 

Zuleyhaye da zanayîş ke xeylê kelepulî ameyî şirawitiş la nê prosesî de ganî paştîdayîş bibo û wina dewam kerd: “Roja diyîne ra nata xebata xelisnayîşî hetê zerrîwaştoxan û hemwelatîyan ra ame rayraberdiş. Hemwelatîyî bi qêrayîş û hewar hetkarî waştêne. Eke organîzasyonêk baş bibayêne, hetkarîyêk bibayêne do xeylê kesî biameyne xelisnayîş. Travmayêk ke erdlerzî viraşto esto. Bêumudî esto. Lazimî xeylê ame şirawitiş la nê prosesî de ganî paştîdayîş bibo. Lazimî bi kon û sobeyan zaf esta. Gida û kelepulê pakîye her tim ganî bibî. Lazimî bi paştîdayîşê psîkolojîkî esta. Raştîya erdlerzî newe yeno ferqkerdiş.”

 

Nêweşîyî rî dayî

 

Zuleyhaye ard ziwan ke problemê awe, kêmbîyayîşê tuwaletanê seyarî benê sebebê nêweşîyan û wina dewam kerd: “Her ke hewa germ beno nêweşî dewam keno. Hema zî binê xirban ra cenazeyî vejîyenê. Şar hema zî merdimanê xo gêreno. Vera çimeyê ke destê îqtîdarî de zêde yê, erdlerzî ra nîno xerckerdiş. Hemwelatîyî hema zî bêkon ê. Îqtîdar hewl dano Hatayî veng bikero. Şar starbîyayîşî vera koç keno. La nêwazenê koç bikerê.”

 

Kampanya ameye destpêkerdiş

 

Zuleyhaye dîyar kerd ke HDP kampanyaya ‘ma keyeyan anê tê het’ da destpêkerdiş û na babete de zî wina vat: “Bi hetkarîya kolîyan tena nêbeno. Coka ra zî ganî keyeyî pîya bikewê têgêrayîş mîyan. Çike na kampanyaya ke ma daya destpêkerdiş ca de ya. Ma bi keya, dînamîkê herême, hêzê kede û demokrasîye reyde serê awankerdişê newe ra munaqaşayan rayra benê. Ma herêman reyde derheqê awankerdişî de qeraran gênê. Ganî ma dewlete bidî zorî ke bacê ke yenê arêdayîş seba şarî xerc bikera.”