Sema Çaglak

 

DÎLOK – Xebatkara weşîye Zeynep Hazal Kaya, bale ant serê kêmîyê xizmetê weşîye yê Îslahye û vat ke ganî xo biresnê dewan, xeylêk cinîyê diganeyî seba  ke nêeşkenê xo biresnê xizmetê weşîye, ver erzenê.

 

Bilançoya erdlerzê ke merkezê ci Mereş o her ke şino giran beno, herêma erdlerzî de problemê weşîye zî zêde benê. Xebatkara weşîye Zeynep Hazal Kaya ke qezaya Îslahiye ya Dîlokî mexdûrê erdlerzî rê xizmet kena, derheqê problemê weşîye yê cinîyan de agahî da.

 

‘Cinî nêeşkenê lazimîyê xo vajê’

 

Zeynepe, dîyar kerd ke erdlerzî ra tewr zêde cinî û tutî tesîr bîyê û vat: “Rojê ewilî de hemwelatîyî hewildayîşê xilaskerdişê tutanê xo de bî û seba nê xeylêk bi stres bî. Xeylêk cinîyî seba nê stresî vernîya wextê xo regl bî. La malzemeyê înan ê hîjyenîk keyeyê înan de mendibî. Cinîyî nêeşkenê şêrê zereyê keyeyê xo û malzemeyê ke lazimê bigîrê. Xora hetkarîya yewin ke ame kerdiş de malzemeyê seba cinîyan çinbî. Kesê ke hetkarî resnayîne herême zêdeyêr camêrdî bî û seba zîhniyetê pederşahî lazimîyê cinîyan verê çiman de nêamebî girewtiş. Seba nê cinî waştiş de bi qesawet bî. Seba ke cinîyan nêeşkayîne lazimîyê xo qal bikerê, mexdurîyetêke pîl ciwîyayî.”

 

‘Tutê cinîyan verê înan ra şî’

 

Zeynepe dîyar kerd ke wareyê erdlerzî seba cenazeyê ke teber de bî jan vila bîyo û vat: “Seba hewaya serdine xeylêk tutan serd girewto û nêweş kewtê. Problemê cinîyan ê bingehîn zî hetê hîjyenê bi. Nê prosesî de xeylêk cinîyê diganeyî tutê înan vera şî. Seba ke vernîya nê mexdurîyetî nêameye padayîş û tu kes ser de nêvindert xeylêk cinîyê diganeyî tutê înan pîzeyê înan de merdî. Sewbîna heta nika zî xeylêk cinîyê diganeyî nê tehluke reyde rî bi rî yê.”

 

‘Dewijî nêeşkenê xo biresnê xizmetê weşîye’

 

Zeynepe dîyar kerd ke cinîyê ke dewan de manenê nêeşkenê xo biresnê xizmetê weşîye û wina vat: “Welatijan rê tîmêke weşîye nêameye awankerdiş. Nê het ra mexdûrîyetêk pîl virazîya. Ez xebatkara weşîye ya la ca ame mi mecbûrî ebetî kerd. Seba ke xebatkarê tîya şirawitî cayê bîn. Seba nê kesê ke beşê înan weşîye cîya zî mecbûr beşê bîn de zî xebityayî. Hem kêmîyê cîhazan estbî hem zî kêmîyê doktoran. Xeylêk cinîyê diganî seba ke tutî înan ver nêşêrê, nêeşkayî dermanan bigîrê û no het ra hetkarîya înan nêame kerdiş.”

 

‘Xebatkarê ma bi mobîngî reyde rî bi rî mendî’

 

Zeynepe, da zanayîş ke înan bi îmkanê xo dermanxaneyêk akerdî û vat: “Xebatkarê ma yê zerrîwazî roja ewilî ra heta nika bi pêro îmkananê xo hewil danê ke xo biresnê cinî û tutan û vilakerdişê dermanan kenê. La çi heyf ma ameyî astengkerdiş. Xeylêk reyan malzemeyê ma yê hetkarî ameyî desteserkerdiş. Xebatkarê ma şert û mercê xidar de şuxulênê. Xeylêk reyan bi mobîngî reyde rî bi rî mendî. Rexmê pêro nê çîyan zî hewl danê ke hetkarîya şarê xo bikerê.”

 

‘Seba tutan xebate lazim a’

 

Zeynepe qiseykerdişê xo wina qedêna: “Dermanxaneyêke qezaya Islahiyeye ame akerdiş labelê ganî seba dewijan zî hetkarî bêra kerdiş. Xeylêk welatijê ke seba nêweşîye nêeşkenê mîyanê nîvînan ra vejîyê estê û cinîyê ke newe welidnayê xo biresnê malzeme û xizmetê weşîye. Seba nê zî ganî yew bi yew keyeyan û konan bigeyrê û lazimîyê mexdûran bi ca bîyarê. Sewbîna ganî rewşa tutan zî bêra vînayîş û lazimîyê înan bi ca bîyarê. Her lerzî de tutî tesîr benê û kewenê rewşêka nêbaş. Coka ganî tutan rê bername û aktîvîte zêdeyêr bêrê kerdiş.”