Dîlan Babat

 

DÎLOK - Sîbel Şahîne ya ke keyeyê aye yê taxa Bogazîçî yê Islahîye rijyabi da zanayîş ke bi bermayîş konêk girewta û vat ke di rojan tu kesêk nêşîyo hetkarîya înan. Sîbele wina vat: "Seba ke bebekê min ê 4 serrî nêmiro ez kewta binê xirbî û mama ci xelisna."

 

Bîlançoya giran ya erdlerzê Mereşî Dîlok û qezayanê ci de her ke şino giran bena. Taxa Bogazîçî ya ke tede 21 keyeyî mendêne de di kesî dinyaya xo bedilnayî. 21 keyeyî pêro rijîyayî û zinarê ke koyan ra kewtî war goristan û rayîrî texrîb kerd. 

 

'Leşkerî rewşa ma nêpersayî'

 

Sîbel Şahîne dîyar kerd ke konan bi îmkananê xo viraştî û seba ke dewlete çinî bî ê mecbur mendê ke konan bi xo akerê. Sîbele wina dewam kerd: "Mêrdeyê mi çina dî ard ma kon viraşt. Bebeka mi ya 4 aşmî esta. Ma mecbur mendê. Her çend ke ma kon waşt ê nêdayî ma. Keda ma çinî bî. Ez nêwazena keyeyê xo na rewşe de bivîna. Ez şew û roje bermena la çîyo ke ez bikera çin o. Tu çîyêk nîno tîya. Roja ewile leşkerî verê ma ra derbaz bîyî la qet rewşa ma nêpersayî."

 

'Selahîyetdarî nêameyî’

 

Sîbele qiseykerdişê xo wina domna: "Ma cenazeyanê xo tena sereyê xo vetî û defin kerdî. Tu kesêk çinî bî. Seba dewanê bînan hetkarî yena şirawitiş. La kesêma rewşa ma nêvêneno. Biverdêne leşkeran keyayê ma zî nêame. Mi bi parsekî û bermî kon girewt. Konî çin ê. Ma kon viraşt la tutê mi hema zî bermenê û tersenê. Ez tewrê bebekê xo yê 4 aşmî şîya Edîrne û ma pê çîyê ke mi uca ard debara xo kenê. Şar hetkarî şiraweno. Ma şinê tuwaletanê keyeyê rijyayeyan. Ma nêeşkenê sereyê tutan  bişuyî."

 

'Mi vewre helna kerd awe'

 

Sîbele qiseykerdişê xo wina qedêna: "Konteyniranê tîyayî zî şar bi îmkananê xo girewt. Dejê ke ma ant qet nîno vîrîkerdiş. Vanê ma do yew serrî de bivirazî. La no dej do derbaz bibo gelo? Derbaz nêbeno. Ciwanêk 19 serrî verê çimanê mi de dinyaya xo bedilnaye. Di rojan tu kesêk nêame tîya. Ma bi îmkananê xo têkoşînê cuye da. Ma vewre helna kerd awe. Vîşêrê hetkarîya şarî tu hetkarîya dewlete çinî bî."