Şehrîban Aslan

 

MELETÎ - Dewa Mihaciran ke 330 keyeyî yê erdlerzî de pêro rijya. Selahîyetdaran dimayê 10 rojan bi helîkopteran hewa ra gofretan eştî dewe.

 

Dimayê erdlerzê merkezê ci Mereş bi û tesîrêk pîl serê 11 bajaran de kerd, bi hezaran kesî merdî û bi hezaran awanî rijyayî. Yew nê cayan ra zî dewa Mihaciran ê qezaya Wêranşarî ya Meletî bî. La dewe hetê dewlete ra terkê qedera înan ameya kerdiş. Dewe de 11 kesî binê xirbeyan de mendî û dinyaya xo bedelnayî. 3 kesî binê xirbeyan de veşayî û dinyaya xo bedelnayî. Dewijî dîyar kenê ke eke ekîbe rew biameyîne do kes nêmerdêne.

 

330 keyeyî rijyayî

 

 

Dewa Mihaciran yew keyeyêk serê lingan de nêmendo. Bêvengîyêk esto û seke dewe veng bibî. Dewijan baxçeyê xo yê binê xirbeyan de mendê bi bêre pak kerdêne. Dewijan çîyê ke ciwîyayî mîkrofonê ma rê qal kerdî û dîyar kerdî ke 330 keyeyê dewe pêro rijyayê.

 

‘Parlamenterê AKPyî reaksîyon dî û şi’

 

Di kesan ke yewî vat o qorîcî yo, dîyar kerd ke tu hetkarî nêameya dewa înan û wina vat: “Ez bi serran o xebityaya. Keyeyê mi ewro rijya. Ma binê xirbe de mendî. La dewlete tu hetkarî nêda. Ewil HDP ame hetkarîya ma. Dima ra CHP ame. Înan vengê ma da eşnawitiş. Pêwa ma bi desin rey înan gêrayî cendirme û selahîyetdarî nêameyî. Dewe terkê mergî kerdî. Seba ma kurdê elewî yê paştdayîş nêdayî ma. Şêrê dewa Sunnî ra biewnê her roje hetkarî yena kerdiş. Ma hemverê hetkarîyan nîyê. La ganî seba ma zî biameyîne kerdiş. 10 rojî dima seke çîyêk nêbîyo Parlamenterê AKPyî ame la dimayê ke reaksîyon dî  wesayîtê xo espar bi û şi.”

 

Wazenê ewil xirbeyan ra çekî bêrê vetiş

 

Dewijan dîyar kerdî ke cendermeyî dima ra ameyê dewe û waştê ke ewil qorîcî çekanê xo binê xirbeyan ra vejê.

 

‘Teber de vewre zerre de erdlerz’

 

Nursel Bazuye nê çîyan ard ziwan: “Erdlerzî ra ver sey her kesî cuya ma zî weş bî. Rewşa ma baş bî. Dima ra erdlerz qewimîya û her çî serûbin bî. Sibayê erdlezî ma xo eşt teber. Ma kewtî wesayîtanê xo. Keya mekteb akerd. Ma erdlerzo gird uca de dî. Tay mecbur mendî ke şêrî keyeyê xo. La erdlerzo diyîne de xeylê kesî keyeyanê xo de mendî. Keye rijîyayî. Xeylê kesî merdî. Cuye wêran bî. Dayîka mi 4 saetî binê xirbî de mend. Pîrika mi binê xirbî de dinyaya xo bedilnaye. Way û birayêk mi Wêranşarî ra ameyî û dayîka mi vetî. Roja ewilîn ya erdlerzî de ma heme vere varanî de şil bîyî. Di konî dayî ma. Nê konan mîyan de verê cû heywan estbî. Ma 80 kesî konêk de mendî. Ma soba rona. Ma dor bi dore dormeyê sobeye de vindenê. 11 kesî dewa ma de merdî. La heme keyeyî rijîyayî.”

 

‘Dewlete 10 roje ra dima ameye’

 

Nursele da zanayîş ke 24 saetê ewilînan de ne awe û ne nan estbî, ekîbê xilaskerdişî ra zî kesêk nêame dewe û wina reaksîyon mojnaye: “Ez û mêrdeyê mi ma 10 rojan pîkab de mendî. Xeylê serdin bî. 24 saetan ra dima merdimê ma yê Îzmîrî resayî hetkarîya ma. 10 rojan ra dima firmaya ke ma mişmişan dayene ci ame vat çi lazimîya şima esto. Ma konan waşt. Dewlete 10 roje ra dima helîkopteran ra gofret eşte. 10-15 kon û tay kolîyan rona. Gelo merdim çend rojan eşkeno bi înan îdare bikero. Ma perişan bîyî. Kesêk nêame hetkarîya ma.”

 

Nursele qiseykerdişê xo yê peyênan de wina vat: “HDP û CHP ameyî hetkarîya ma. Walîyê Sêwasî ame la şaredarê ma nêame. Heta pirdî ameyo la wexto ke dîyo rijnayîş zêde yo tepîya agêrayo. Show Tv ame ma reyde roportaj kerd. La zafê roportajê ma birnayo. Keyeyê ma heme kesan xisar dîyî. Rapor dayî la seba keyeyê ke wêran bîyî raporê nîmxisarin dayî. Gelo no senî beno. Ma vanê gerre bikerê wa bêrê na rewşe raşt bikerê.”