Nîşmiye Guler

 

MEREŞ - Dewa Pinar Huyukî ke 90 keyeyî rijyayî, kesê erdlerz ra xilas bîyê zî vîrardişê tarîxî yê 7 hezar û 500 serran newe kenê û cuyêka komînal awan kenê. 

 

Mîyanê 20 rojê erdlerzî de tena hewldayîşêk selahîyetdaran estbî o zî werte ra wedarnayîşê xirbeyan bi. Cayê merkezî de hîn konî ameyî ronayîş û dima ra mizgînîya “awanîyê newe" yê ke do bêrê viraştîşî dayî. Selahîyetdarê ke nêresayî dewan, ê zî qedera xo rê verdayî. Pêwa pêro wêranî û merdişan mexdûrê erdlerzî bi merkezê koordînasyonê erdlerzî yê hetê sazgehê sivîlî yê demokratîk ra ameyê awankerdiş, hetkarîyê teber û zerrîwazê ke ber bi ber şinê, hewl danê birînanê xo bipêşê.

 

 

Dewa Pinar Huyukî ya qezaya Kurdogolî ya Mereşî de kurdê elewî ciwîyenê. Dewê 103 keyeyî ra yena meydan 90 keyî seba erdlerzî rijyayî, 9 kesî binê xirbeyan de dinyaya xo bedelnayî. Dewa ke merkezê erdlerzî yê xeylêk reyan erdlerzî virazyayî.

 

Herêma ke wayîrê tarîxê nêzdîyê 7 hezar û 500 serrî yê kulturê cuya komînal gane beno. Dewijê ke keyeyê înan seba erdlerzî rijyayî, baxçeyê Keyeyê Kultur û Komelî yê ke serra 2012ine de awan kerdibî cuya xo dewam kenê. Awanîya Keyeyê Kultur û Komelî seba erdlerzê xeylî rijîya. Dewijê ke baxçeyê nê cayî kenê cayê kombîyayîşî, tîya hetkarîya yewbînan kenê.

 

'Bi hetkarîya zerrîwazan payan ser de yê’

 

 

Hemwelatîyê dewe bi naylon û betanîyeyan baxçe de kon akerdî û xo rê raşteyê cuye viraştî. Bi israr 4 konî AFADî ra girewtî. Tîya de raşteyê werd û şimitişî yewbînan ra ameyî cîyakerdiş. Seba ke xo hewayo serdin ra bipawî sobeyî ronayî. Werd pîya yeno pewtiş.

 

Her konêk de di keyeyî pîya cuyenî. Dewijê ke kêmbîyayîşê konan ra gerre kenê dîyar kerdî ke umudê înan tu selahîyetdarêkî ra çin o û ê bi wesîleya zerrîwaştoxan payan ser de mendî. Dewijê dewe ardî ziwan ke no 20 roje yo ke dewlete nîna, tîya de tena paştîdayîş û hetkarîya şarî esta.

 

Hatîce Serîna ke tîya de cuyena da zanayîş ke 4 rojan nê konê ke înan bi xo awan kerdî de mendî û dimayê israran AFAD kon dayo înan. La nika zî konan de cereyan çin o. 

 

Zubeyde Bala ke aye zî mexduranê erdlerzî ra ya dîyar kerd ke tewrê aye mêrde, 8 tutê aye konêk de manenê. Zubeyde vat ke heta nika hetkarîya dewlete nêameya û bi paştîdayîşê şarî cuya înan derbaz bena.

 

Cuya komunal yena awankerdiş 

 

 

Dewê wêranbîyayeyan de xirbê ke dusayî raşteyan paweyê wedarnayîşî yê. Rewşa herême ra wina asîyeno ke hema xeylê cayan de qey xebata cigêrayîş û xelisnayîşî nêameya kerdiş. Vera hende çîyan mexdurê erdlerzî yê dewan bi hêzê xo û rihê yewbînantepiştişî cuya xo newe ra awan kenê.