Sema Çaglak - Rabîa Onver 

 

DÎLOK - Yeter Gença 80 serrî ke dewa Şarko ya Islahîye de manena bi desan merdimanê xo erdlerzî de vînî kerd. Yetere wina vat: “Ez hema zî nêşîya şînê merdimanê xo û mi cenazeyê înan nêdî. Ez keye de tena manena û tu kes nêmend ke bêra hetkarîya mi.”

 

Erdlerzo ke merkezê ci qezaya Bazarcixî ya Mereşî bî 10 bajaran ser de xeylê tesîrêk gird û zirarêk gird pê ard. Hemwelatîyê ke herêma erdlerzî de mendî bade bobelatî xeylê hedîse û hîkayeyan rê hîssinan rê şahidi kerdî. Herême de awanîya ke erdlerzî ra zirar nêdîya nêmend. Cayê ke erdlerzî ra zirar dîyî ra yew zî qezaya Islahîye ya Dîlokî ya. Dewê Islahîye rê zî rojanê werênan de hetkarî nêame kerdiş û komê xelisnayîşî badê 2-3 rojan derbazê dewe bîyî. Erêmendişê koma dezgehê dewlete ya Rewşa Lezgînî (AFAD) vera xeylê hemwelatîyî binê xirban de dinyaya xo bedilnayî û bi hezaran kesî zî birîndar bîyî. Hema zî dewê Islahîye û xeylê dewê bînî bi awanîyanê rijyayeyan pirkerde yê.

 

Yeter Gença 80 serrî ke 50 serrî yo dewa Şarkoye de manena zî nê kesan ra yew a. Nika bi tena serê xo kon de manena. Yetera ke xeylê nêweşîyê aye estî û tehlukeyê aye yê krîzê zerrî esto hema zî bine tesîrê erdlerzî de ya. Yetere roja erdlerzî de keyeyê xo de tena bîya û aye wext bi hetkarîya cîrananê xo keyeyê xo yê rijyaye ra binê xirban ra xelisîyaya.

 

‘Tu kes çinî bî’

 

Yetere destpêkê qiseykerdişê xo de heme kesan rê serweşîye waşt û wina vat: “Roja erdlerzî vîrê mi ra nêşina. Ez keye de tena bîya. Hema hema tay mendbî ke ez delu biba. Banê keyeyî rijîyayêne û ez xeylê bêçare menda. Tu kes çinî bî. Dima ra lajê cîranê ma ame mi xelisna. Heme tutê mi tîya de nîyê. Ez bi linganê zitan (warway) vejîyaya teber û êdî nêzanayêne se bikera. Ez ne eşkena lazimîyanê xo yê esasîyan pê bîyara ne zî tesîrê aye roje eşkena xo ser ra bierza. Ez bi tena serê xo na dewe de manena.”

 

‘Bi desan merdime mi dinyaya xo bedilnayî’

 

Yetera qiseykerdişî de zehmetî ancena da zanayîş ke tena taxa înan ra 30 kesî dinyaya xo bedilnayî û wina qedêna: “Heme merdime mi dinyaya xo bedilnayî. Ez hema zî nêşîya şînê înan mi cenazeyê înan nêdî. Keyeyê mi ra xeylê kesî dinyaya xo bedilnayî û nêverdenê ke ez înan bivîna. Eke cîranê mi nêameyêne beno ke mi krîzê zerrî bivîyarnayêne. Kes hetkarîya mi nêkeno. Ez hema zî kon de tena serê xo manena. Timî dewxê mi şino û ez gêj bena. Keyeyê mi ra bi desan kesî binê xirban de dinayaya xo bedilnayî. Ez bêkes menda. Hetkarî wazena.”