RIHA - Çalakîya "Nobeta Edaletî" ya keyeyê Şenyaşarî 704 rojî yo dewam kena. Çalakîya ewro de wina ame vatiş: "Demê babate bena  îqtîdar çi heyf dozgerî zî nêeşkenê muhakeme bikerê."

 

Merdim û pawitoxê parlamenterê AKPyî yê Rihayê Îbrahîm Halîl Yildiz 14ê hezîrana 2018ine de qezaya Pirsûsê Rihayî de hêrişê keyeyê Şenyaşarî kerdî. Netîceyê hêrişî de mêrde û di lajê Emîne Şenyaşare ameyî qetilkerdiş. Emîne Şenyaşar û lajê aye Ferît Şenyaşar 9ê Adara 2021ine de verê Edlîyeyê Rihayî de dest bi çalakîya Nobeta Edaletî kerdî. Çalakîya keyeyê Şenyaşarî roja 704ine de verê Edlîyeyê Rihayî de dewam kena.

 

Emîne Şenyaşar û lajê aye Ferît Şenyaşar qezaya Pirsûsî ra ameyê verê Edlîyeyê Rihayî û verê pankartê ke ser de ‘Edalet’ nuştêne  çalakîya xo ya ewro dewam kerdî.

 

Ferît Şenyaşar ewilî qisey kerd û vat, pêwa 704 rojê çalakîya nobeta edaletî zî waştişê înan bi ca nêameyê û wina vat: “704 rojî derbaz bî. La wa xo bikerê vera dayîka ke pêwa pîrbîyayîşê xo fek keyeyê xo ra vera daya û seba edalet bica bêro venga dozgeran kena. Her roje Serdozgerê Komare bi wesayîtê xo yê luksî verê ma ra derbaz benê. Demo ke babete bena îqtîdar, çi heyf dozgerî zî nêeşkenê  muhakeme bikerê. Verê zî demê ma dozgeran rê pêvînayîş kerdêne, tu kes nêeşkayîne ma ra vajo şima nêheq ê. Eynî wextî de selahîyetdarê dewlete zî ma ra vatêne sebir bikerê. Eke rojêke wekiliyê ci bikewo, dîmenê qirkerdişê nêweşxaneyî do vejîyê werte. O wext pêro dinya do bivîna, wekîlêk senîn bi hêzê sîyasetî nêweşxaneyê dewlete de qirkerdiş pê ardo. Îqtîdar zî nê erdlerzî de binê xirban de mend. Pêro kesî paweyê vurnayîşê sîyasî yê."

 

Dima ra zî Emîne Şenyaşare qisey kerd û ard ziwan ke 5 serrî yo tutê aye hucreyê yew kesî de tepişte yo û wina vat: “Wijdanê îqtîdarî çin o. Îqtîdar zî dimayê kesê ke keyeyêk  qetil kerd tepişneno. Zulmî rê êdî bes o, wa heme kesê bêsûc bêrê veradayîş û tutê mi zî bêro veradayîş. Heta tutê mi nêro veradayîş, ma do tîya ra nêwurzê û nobeta xo dewam bikerê. Ewro roja înê ya ma dûanê xo Homayî rê kenê ke heqê ma nêverdo, çîyê ke no îqtîdar nêmineno, wa vejîyê werte."