Marta Somek

 

SEMSÛR - Fatma Kayşiyoguna ke 6 merdimanê xo erdlerzî de vînî kerd û mêrdeyê aye servîsê ciewnîyayîşê giranî de yo, nika tewrê tutanê xo banêk xisarin de cuyena. Fatmaye da zanayîş ke heta nika dewlete tu hetkarîya înan nêkerda û vengê paştîdayîşî kerd.

 

6ê Sibate de merkezê ci Mereş de di erdlerzî qewimîyayî û 10 bajaran de tesîrê girdi pê ameyî. Xebata wedarişê xirban û rijnayîşê banê xisarkerde dewam kena. 20ê Sibate de saet 20.05î de merkezê ci Samandag û Defne yê Hatayî de erdlerzêk bîn qewimîya. Nê bajarê ke tewr zêde erdlerzî ra tesîr bîyî ra yew zî Semsûr o. Ekîbê xilaskerdişî û dewlete bade 4 rojan şî Semsûrî. Hemwelatîyî bi hewldayîşê zerrîwazan yê ke şîyî payan de manenê. 

 

Roja 18ine de hetkarî çin a

 

Binê xirbanê bajaran de bi deshezaran kesî dinyaya xo bedelnayî û bi deshezaran kesî zî bê kefen pê kincanê xo ameyî definkerdiş. La heto bîn de zî yeno zanayîş ke bajar de xeylê mezelê komî zî estê.

 

Semsûr de kesê ke erdlerzî ra xelisîyayî nika îhtîyacê kelepulê pakî û gidayî cuyenî. La çi heyf ke ê nêresnenê îhtîyacan. Partîya Demokratîke ya Şaran (HDP) û cinîyî seba hemwelatîyan kon ronaye. Ma şaro ke konan de cuyenî reyde pêvînayîş pê ard û hemwelatîyî dîyar kerdî ke îqtîdar bi tu hawayî paştî nêdano înan. Fatma Kaşiyogune derheqê babete de qisey kerd û vat ke roja 18ine ya erdlerzî de yê û aye 6 merdimanê xo erdlerzî de vînî kerda.

 

Ma eşkenê se bikerî?

 

Fatmaye dîyar kerd ke roja ke erdlerz pê ame de odeyê cîyayî de rakewtebîyî û wina dewam kerd: “Lajê mi yo pîl, kênaya mi zerre ra vejîyabî. Ez û di tutê xo oda de mendî. Berê keyeyê ameyî girewtiş. Ma bi zorî ber akerd. Heta ke ma vejîyayî mêrdeyê mi tersî vera krîzê zerrî derbaz kerd. Di reyan derbaz kerd. Ma berd nêweşxane û anjiyo kerd. La baş nêbê. Ma pê ambulansî berd Riha û uca de girîya servîsê ciewnîyayîşê giranî. Amelîyatê baypassî bi. Krîzê zerrî da organanê ci. Nika girêdayeyê makîneyî yo. No di roje yo derman ame birnayîş la nêwirzeno. Ez bi çar tutanê xo reyde tena menda. Tu ameyîşê ma çin o. Konê ma çin o. Ma nêzanê se bikerê.”

 

‘Ma heta nika çîyêk dewlete nêdî’

 

Fatmaye wina dewam kerd: “Badê erdlerzî xeylê bajaran ra zerrîwazî ameyî. Nan, awa fêkîyan, awe û çîyanê binan vila kerdî. Ma Riha ra zaf hetkarî girewt. La ma dewlete ra çîyêk nêgirewt. Mêrdeyê mi nêweş o, ma nêeşkenê bikewî e-dewlete. Şîfreyê ma ci de yê. Ma keyeyê xo yê xisarin de manenê. Ma nobete tepişenê. Ez heta sere sibayî vere tutanê xo de vindena. Ez nêzana şêra ça.”

 

‘Ma paweyê hetkarîye yî’

 

Fatmaye ard ziwan ke 6ê Sibate de pî, dayîk û datê ci tewrê 3 kênayanê xo binê xirban de mendî û dinayaya xo bedelnayî û wina peynî kerd: “Awanîya 5 qatin serê înan de kewt. Ma hende bermayî ke çimê ma zuha bîyî. Kesebaya ma vêşena. Acaba no hedîse do reyna bibo? Acaba do dayîk û pîyê mi uca ra bivejî. Acaba do mêrdeyê mi baş bibo. Ma cuya xo ya verên gêrenê. Cîranê ma heme şîyî. Ma tîya de mendî. Ma wazenê ke kon bidî ma. Ez vengê hetkarîye dana.”