Sema Çaglak - Rabîa Onver

 

DÎLOK - Emel Muhammeda ke erdlerzî vera nêeşkaye dekewa keyeyê xo yê taxa Etîlerî baxçeyê keyeyê xo de kon akerd, la hetê keyayê taxe ra seba wedarnayîşê konî bi cezaya pereyî ameye tehdîtkerdiş. Emele vat: "Yan wa bi verdê ma kon akerê ya zî wa probleman çareser bikerê."

 

Erdlerzo ke merkezê ci qezaya Bazarcixî ya Mereşî bî û şewa 6ê Sibate de pê ame 11 bajaran ser de tesîrêk gird viraşt. Nê bajaran ra yew zî Dîlok o. Dîlok û qezayê ci zirarêk gird erdlerzî de dîyî. Hema zî xeylê hemwelatîyî nêeşkenê şêrî keyeyanê xo û teber de manenê. Sewbîna Dîlok de hemwelatîyê ke Sûrîye ra koçber bîyî cîyakerîyan reyde rî bi rî manenê. Nê kesan ra yew zî Emel Muhammed a û taxa Etîlerî de cuyena.

 

'Nêverdenê ma kon akerê'

 

Emel Muhammeda 43 serrî dîyar kerd ke ê nêeşkenê dekewê keyeyanê xo û wina vat: "Ma keye ra vejîyayî. Ma keye de 10 tenî cuyenî. Mi tutan rê konêk viraşt. La vanê ganî şima wedarnê. Ez tersena şêra keye. Ez do se bikera nêzana. Tutî keye de bermenê û nêwazenê şêrê keye. Bi taybetî şewe xeylê serdin o. Tutê mi hewayo serdin vera pêro nêweş kewtî. Ma adir tafînenê û wina xo germ kenê. Ma kon akerd la keyayê taxe vat ke eke şima kon nêwedarnê ma do 5 hezar TL ceza şima rê bibirnê. Nika ma teber de hewayo serdin de manenê."

 

'Tu belgeyêk nêmojnayî'

 

Emele da zanayîş ke waştişê înan tena akerdişê konêk o û wina qiseykerdişê xo peynî kerd: "Ez tersena keye de bimana. Keye de xisar esto. Seba ke tutî zêde tersayî nêwazenê dekewî zerreyê keye. Mi kon bi 900 TL yî herîna. La keyayê taxe kon wedarna. Ez û tutê xo nika teber de yê. Ma bi şewe tîya de manenê. Ez tena wazena konêk akera. Mi zirar nêda tu kesêk. Pereyê mi çin o ke ez cezaye bida. Tu belgeyêk nêmojnayî. Tena vatî ke 'Wedarnê nêke do ceza bêra'."