Rojda Aydin - Rozerîn Gultekîn

 

AMED - Zelîha Kaya Parka Koşuyoluye ya Rezan de goreyê îmkananê xo konan akerd û 14 kesî nika konan de cuyenî û vat: “Nê rojî rojê zehmetin ê û ganî ma wayîrê yewbînan bivejî û hetkarîya yewbînan bikerê.”

 

Roja ewilin ya erdlerzo ke 6ê Sibate de Mereş de pê ame û 11 bajaran girewt binê tesîrê xo ra nata paştîdayîşê şarî ya rêxistinkerde dewam kena. AFADo ke bi bacanê şarî payan ser de maneno heta nika şarî rê se kerdo raşte de yo. Hetkarîya AFADî ya cîyayîya nasname, ziwan û fehmî herême de dewam kena. Nê kesan ra yew zî Zelîha Kayaye ya. Zelîhaye zî sey bi hezaran keyeyê ke Amed de erdlerzî ra tesîr bîyî, nika Parka Koşuyoluye ya qezaya Rezanî de bi şert tû mercanê xo hewl dana bicuya. Zelîhaye ajansê ma rê qala cîyayê û zehmetîyan ke cuyena kerd û vengê paştîdayîşî kerd.

 

‘Ganî probleme şarî bêrê çareserkerdiş’

 

Zelîhaye ard ziwan ke roja ewilîn ya erdlerzî ra nata Parka Koşuyoluye de manenê û 8 merdimê aye binê xirban de mendî. Zelîhaye wina qala a roje kerd: “Roja ewile ma wesayî de mendî û ceza ma rê birnayî. Ma AFADî ra kon waşt la nêdayî. Dima ra ma bi îmkananê xo asin ard û parke de kon akerd. Kono ke ma aker de 14 tenî manenê. Xeylê merdime ma binê xirban de mendî û dinyaya xo bedelnayî. Sewbîna banê ma zirar dî. Ma nêwzenê ke hemwelatîyêk bîn mexdur bibo. Wa problemê heme kesan bêrî çareserkerdiş. Cotikê mi estî la potê hazir û mama çin o. Lajê mi yê şenik ê di serre zî nêweşê SMA yo û nika nêweşxane de yo.”

 

‘Bi hetkarîya şarî cenaze ameyî vetiş’

 

Awanîya Zelîhaye ya taxa Rezanî erdlerzî de xisar dîyo û Zelîha wina bale ant rewşe ser: “Seba ke banê ma xisar dî ma nêewtanenê ke şêrî banê xo. Mi 8 merdimanê xo erdlerzî de vînî kerd. Roja ewilîn de ma bi hetkarîya şarî cenazeyan û birîndaranê xo binê xirban ra vetî. Heta ke AFAD ame dima ra kesê bînî ameyî vetiş la xeylê erê mendî.”

 

Umudê înan dewlete ra nê şarî ra esto

 

Zelîhaye da zanayîş ke hetkarîya ke hetê dewlete ra yena arêdayîş seyyewbînan nîna vilakerdiş û wina dewam kerd: “Xeylê hetkarîyî Tirkîya ra ameyî la nika konêk zî nêdanî mexduran. Nika îmkanê mi çinê ke ez şêra awanîyêk kîra û bêçareyî vera tewrê tutanê xo serd û seqemî mîyan de parke de cuyenî. Verê cû zî rewşa ma ya ekonomîye baş nêbî û mêrdeyê mi seba ke nêweş o, ma bi zorî debara xo kerdêne. Tewr peynî DEDAŞ 24 hezar TL deynê cereyanî mi rê birna. Ez do senî bida, ez do senî tutanê xo miqate bikera û ez do senî awanîyêk kîra de bimanan. Umudê înan dewlete ra nê şarî ra esto.”

 

Zelîhaye qiseykerdişê xo yê peyênan de veng da û vat: “Xeylê kesî nika nê keye û war mendî. Ez vana ke wa kîrayan zêde nêkerê. Na roje roja zehmetin a û ganî ma wayîrê yewbînan bivejî û paştî bidî yewbînan.”