Marta Somek

 

STENBOL - Nevruz Tugçe Ozçelîka ke 10 rojan Dîlok de xebata ekîbê xelisnayîşî taqîp kerde da zanayîş ke cinîyî nêeşkenê lazimîyanê xo bîyarê ziwan û vat ke hedefê înan yê yewine awankerdişê ekîbêk xelisnayîşî yê femînîste yo û dîyar kerd ke ganî her kes malumatanê hetkarîya yewine bimuso.

 

Erdlerzo ke 6ê Sibate de merkezê ci qezaya Bazarcixî ya Mereşî bî de pê ame tesîrêk gird viraşt û 40 hezarî ra zêder kesî dinyaya xo bedelnayî. 10 bajarê ke erdlerzî ra tesir bîyî ra yew zî bajarê Dîlokî yo. Ame zanayîş ke hirê rojanê ewilînan de AFAD qet nêşîyo Islahîye. Xebata xelisnayîşî hema hema ameye peynîkerdiş, xebata rijnayîşî û wedarnayîşê xirban zî dewam kena.

 

Roja ewilîn ya erdlerzî de koma femînîste Stenbol ra şî Islahîye. Kesê ke kome de ca girewtî ra yew zî Nevruz Tugçe Ozçelîke bî. Nevruze çimdarîyanê xo yê herême ard ziwan.

 

AFAD badê hîrê rojan şî

 

Tugçeye vat ke Komeleya Zerrîwazan Bobelate reyde roja ewile koma femînîste ya zerrîwazan şî Islahîye ya Dîlokî û vat: “10 rojanê ewilînan de ez uca de bîya. Ma taqîbanê xo kerd. Ma xeylê hemwelatîyan xelisna. La çi heyfo ke xeylê kesî dinyaya xo bedelnabî. Wexto ke ma uca de bîyî AFAD konbajarê yewine awan kerd. Ma komêk embazanê xo reyde roja çarine şîyî vere merdimanê uca. Bi raştî problemê girdî yê bêplanî estbî. Cereyan pê jeneratoran ameyêne dayîş la o zî nêşîyêne her cayî. Şar zî xora serê xirban de vindertêne.”

 

Problemê hîjyenî zaf zêde bî

 

Tugçeye wina dewam kerd: “Problemê hîjyenî zaf zêde bî. Cinîyî vatêne binkincê înan çin ê. La nêeşkenê xo îfade bîkerê. Ma yew bi yew cinîyan reyde qisey kerdêne. Ma bi no hawa lazimîyanê înan musayêne. Cesaret nêkerdêne ke vajî ke pedê ma çin o. Bi nimite ameyêne ma rê vatêne. Sewbîna nêeşkayêne îfade bikerê. Çîyê ke ma herêma erdlerzî de cuyayî ma rê tecrubeyêk gird bi ma da qezenckerdiş. Ma no prosesî de reyna dî ke sîstemo serdest yê yew camêrdî cuya cinîye binpay keno. Hemwelatîyê herême dîyar kerdî ke 72 saetê ewilînan de mudaxaleyêk lezubezkî nêame kerdiş. Xora ekîb û hetkarîya zêde Dîlok de bî. Şar reaksiyon mojna na rewşe. Çimkî xirbanê rijîyayeyan de her sanîye zaf muhîm o.”

 

‘Ganî berpirsîyarî hesab bidê’ 

 

Tugçeye da zanayîş ke şar têkoşînê cuye dano û wina domna: “Awe çin a, bêplanî esto, nêeşkenê sereyê xo bişuyî. Awa şimitişî ekîbê xelisnayîşî rê zî nêame tahsîskerdiş. Ma krakerê ke ameyî komeleya ma vila kerdî. Çimkî tu çîyêk bîn çinbî. Ma reyna dî ke kes hetkarî nêerşaweno. Erdlerzêk wina gird de ma dî ke ma eşkenê hetkarîya yewbînan bikerê. Ma ewro muhîmîya na rewşe dî. Qet şik çin o ke dewlete zî vînena, coka ra Mereşî veng kerd. La çîyo muhîm no yo ke ganî hesab berpirsîyaran ra bêro perskerdiş. Dîlok de dêsê awanîyêk xeylê xirab bî. Sey ardî destê merdiman de mendêne. Na awanîye hetê koperatîfî ra ameybî viraştiş. Ganî şar mutahîtê na awanîye biperso. Acaba na awanîye senî wina deste merdiman de hurdî bena. Şar vat ke ‘Ma xo rê goristan girewto’.”

 

Hedef awankerdişê ekîbê xelisnayîşî yê femînîste yo

 

Tugçeye peynîya qiseykerdişê xo de nê çîyan ard ziwan: “Ma xebata xo ya 10 rojan de ferq kerd ke lazimîya cinîyan bi ekîbêk xelisnayîşî ya femînîste esta. Ma wextê vejîyayîşî de vat ke hedefê ma yê yewine awankerdişê ekîbêk femînîste yo. Xora ma bi ekîbê Komeleya Zerrîwazan Bobelate ya Taxe reyde şîyî. Ma do binê banê înan de perwerde bigêrî. Ma na nuqata de veng danê heme cinîyan û her kesî ke binê banê Zerrîdayoxê Bobelate yê Taxe de perwerde bigêrî û malumatê hetkarîya yewine bimusî. No xeylê muhîm o. Cuye xelisneno. Ganî bi lez mudaxale bêro kerdiş.”